ԵԽԽՎ-ն քաղաքական պայքարի դաշտ է և պետք է պայքարել հակահայկական բանաձևերի ընդունման դեմ. Ա. Զաքարյան

Tert.am-ը գրում է.

ԵԽԽՎ մոնիտորինգի հանձնաժողովի անդամներ Պեդրո Ագրամունտի և Թադեուշ Իվինսկու հեղինակած` «Ադրբեջանում ժողովրդավարական ինստիտուտների գործունեությունը» վերնագրով փաստաթուղթը, որում նշվում է, թե Հայաստանը օկուպացրել է Լեռնային Ղարաբաղը, քվեարկության կդրվի ԵԽԽՎ՝ հունիսի 22-26-ին տեղի ունենալիք ամառային նստաշրջանում: Փաստաթուղթը կդառնա բանաձև, եթե ստանա ձայների մեծամասնությունը:  Թե ինչ հակաքայլեր է պատրաստվում անել ԵԽԽՎ–ում հայկական պատվիրակությունը և ինչ տեղի կունենա, եթե փաստաթուղթը վերածվի բանաձևի, այս հարցերի շուրջ Tert.am-ը զրուցել է Ազգային ժողովի արտաքին հարաբերությունների հանձնաժողովի նախագահ, «Հանրապետական» խմբակցության պատգամավոր Արտակ Զաքարյանի հետ:

-Պարո՛ն Զաքարյան, ԵԽԽՎ–ում հայկական պատվիրակությունն ի՞նչ հակաքայլեր է իրականացնելու, կարո՞ղ եք դրանք հրապարակել:

-Չեմ կարող այդ մասին ասել, բայց աշխատանքներ իրականացվում են և այստեղ մի կարևոր հաստատում կա, որը միշտ ասվել ու ասվելու է. ԵԱՀԿ Մինսկի խմբի ձևաչափին խոչընդոտող ցանկացած գործողություն անընդունելի է մեզ համար և այլ խորհրդարանական ու ոչ խորհրդարանական հարթակները, որոնք փորձում են ԼՂ հիմնախնդրի վերաբերյալ տեսակետներ հայտնել, պետք է դուրս չգան Մինսկի խմբի բառապաշարից, որը տարիներ շարունակ օգտագործում է՝ հանուն տարածաշրջանում փոխադարձ վստահության մթնոլորտի պահպանման, տարածաշրջանի խաղաղության:

Հաշվի առնելով, որ Ադրբեջանը պարբերաբար փորձում է իր խավիարային դիվանագիտության միջոցով շեղել և ապակողմնորոշել միջազգային հանրությանը, ԵԽԽՎ պատգամավորները ցանկալի կլինի, որ իրենց որոշումներում առաջնորդվեն Մինսկի Խմբի բառապաշարով:

-Տեսակետներ կան, որ Ադրբեջանը փորձ է անում խնդրի լուծման ձևաչափը փոխել, կարելի՞ է ասել, որ արդեն հաջողություններ ունի այդ հարցում:

-Ո՛չ իհարկե, չի՛ կարելի ասել, որ հաջողություն ունեն, բայց Ադրբեջանը փորձում է զուգահեռաբար քննարկումներ ծավալել և արհեստածին տարբեր փաստաթղթեր ունենալ ԵԽԽՎ-ում: Սա շատ վտանգավոր երևույթ է և վտանգավոր է ոչ միայն Հայաստանի ու Արցախի համար, այլ նաև ամբողջ տարածաշրջանի: Ոչ մի երաշխիք չկա, որ Ադրբեջանը հետագայում այդ փաստաթղթերը չի օգտագործի հերթական արկածախնդրությունը տարածաշրջանում սկսելու համար:

Այն պատգմավորները, որոնք քվեարկում են Ադրբեջանի բանաձևերին կողմ, հետևություններ անելու անհրաժեշտություն ունեն և շատ ուշադիր պետք է լինեն։ Ես՝ որպես պատգամավոր, երբեք ինձ թույլ չեմ տա, առանց հաշվի առնելու բոլոր մանրամասնությունները, գամվել այլ երկրների կոնֆլիկտի մեջ և վտանգել դրանք:

Մենք չենք ասում, որ ԵԽԽՎ-ն պետք է պրոհայկական որոշումներ կայացնի, մենք ասում ենք, որ ԵԽԽՎ-ն մյուս միջազգային կառույցների նման ցանկալի է, որ իր աջակցությունը բերի ԵԱՀԿ Մինսկի խմբի ձևաչափին:

-Կարո՞ղ ենք ասել, որ ԵԽԽՎ-ն կորցրել է ժողովրդավարական արժեքները քարոզելու իր երբեմնի առաքելությունը: 

- Եվրոպան ու եվրոպական միասնական ընտանիքը արժեքների վրա կառուցված միություն է, ու այդ արժեքները գերակշռող են: Բայց, ցավոք իհարկե, կան որոշ պատգամավորներ, որոնք արժեքները ստորադասում են շահերին և առաջնորդվում են անձնական շահերով, որն, իհարկե, ընդունելի չէ:

-ԵԽԽՎ-ում վերջին շրջանում հաճախ են ներկայացվում հակահայկական փաստաթղթեր, արդյո՞ք կարիք չկա վերանայելու մեր մոտեցումը այս կառույցի նկատմամբ:

-Սա քաղաքական պայքարի դաշտ է, և մենք պետք է մեր բոլոր հնարավորություններով պայքարենք, որպեսզի մեր աջակիցները և այն մարդիկ, ովքեր իրապես շահագրգիռ են հիմնախնդրի խաղաղ լուծմանը, կարողանան ներգրավված լինել գործընթացին և թույլ չտալ, որ ԵԽԽՎ-ն ոչ համարժեք որոշումներ կայացնի ու բանաձևեր ընդունի: Իսկ այդ բանաձևերն իրականում ունեն արժեք: Եթե չարտահայտեն իրականությունը, ապա վաղ թե ուշ իրենց վնասակար ազդեցությունն ունենալու են: ԵԽԽՎ-ի յուրաքանչյուր պատգամավոր պետք է սա գիտակցի ու խնդրին մոտենա այդ տեսանկյունից:

-Հայկական պատվիրակությունը որքանո՞վ է կարողանում այդ դաշտում կռիվ տալ հանուն ՀՀ-ի և արդյո՞ք պատվիրակության կազմը վերանայելու կարիք չկա:

- Մեր պատվիրակությունն իրականացնում է իր հնարավորությունների սահմանում ամեն բան, որ գործընթացը գնա այն հունով, որը չի խոչընդոտի ԼՂՀ-ի խնդրի կարգավորմանը ու թույլ չի տա Ադրբեջանին հարցն ավելորդ շահարկումների դաշտ մտցնել: