Ինչ արժե Հայաստանում քթի պլաստիկ վիրահատությունը, ովքեր և ինչու են դիմում. զրույց վիրաբույժ Հովհաննես Ստամբոլցյանի հետ

Վերջին տարիներին Հայաստանը պլաստիկ վիրաբուժության տեսանկյունից տարածաշրջանում առաջատար հորիզոնականներում է հայտնվել: Թե ի՞նչ իրավիճակում է գտնվում պլաստիկ վիրաբուժությունը մեր երկրում, ինչպես նաեւ ամենահաճախ հանդիպող պլաստիկ վիրահատությունների ու գնային քաղաքականության մասին Life.panorama.am-ը զրուցել է «Ավանգարդ» բժշկական կենտրոնի պլաստիկ վիրաբույժ Հովհաննես Ստամբոլցյանի հետ:

-Հովհաննես, ի՞նչ մակարդակի վրա է գտնվում Հայաստանը պլաստիկ վիրաբուժության որակի տեսանկյունից:

-Պետք է ասեմ, որ մեր երկրում պլաստիկ վիրաբուժությունը բավականին բարձր մակարդակի վրա է գտնվում, եթե համեմատենք տարածաշրջանի հետ: Իհարկե, եվրոպական ու ամերիկյան առաջատար կլինիկաների փորձից մի փոքր հետ ենք, բայց մեր երկրում այս ոլորտը շատ ավելի զարգացած է, քան անգամ Ռուսաստանում: Ինքս մասնակցել եմ տարբեր միջազգային կոնֆերանսների, որոնք ցույց են տվել մեր առաջադիմությունը թե Վրաստանի, թե Ռուսաստանի եւ թե Ադրբեջանի համեմատությամբ:

-Մեր երկրում ազգային առանձնահատկությունից ելնելով՝ ամենաշատը կիրառվում է քթի պլաստիկ վիրահատությունը: Հետաքրքիր է, որպես բժիշկ, ի՞նչ եք կարծում հաճախորդները ավելի շատ բարդույթի, թե խնդրի համար են Ձեզ դիմում:

-Նախ՝ պետք է նշեմ, որ ես վիրահատական միջամտություն եմ ցուցաբերում բացառապես 18 տարին լրացած անձանց: Ինձ դիմողների հիմնական խնդիրները կապված են շնչառության խանգարման հետ, որը որոշ դեպքերում կարող է հորինված լինել, որոշ դեպքերում իսկապես համապատասխանել իրականությանը: Այսինքն՝ շատերը կարող են ընտանիքի անդամներին, ընկերներին ստել ու ասել, որ շնչառական խնդիրներ ունեն, միայն նրա համար, որպեսզի իրականացվի պլաստիկ վիրահատություն, բայց իհարկե, լինում են դեպքեր, որ իսկապես կան այդ խնդիրները:

-Հովհաննես, եթե համեմատական անցկացնեք, Ձեզ ավելի շատ դիմում են իգական, թե արական սեռի ներկայացուցիչները:

-Իհարկե, առավել շատ իգական սեռը, քանի որ բարդույթավորվում են հենց ավելի շատ աղջիկներն ու կանայք: Եթե տոկոսային հարաբերություն անցկացնեմ, ինձ դիմողների միայն 10 տոկոսն են տղամարդիկ: Բացի այս, պլաստիկ վիրաբույժին դիմող տղամարդկանց ճնշող մեծամասնությունն իսկապես ունի շնչառական խնդիրներ, 10-ից մեկը կարող է էսթետիկ վիրահատության նպատակով դիմել մեզ:

-Ինչպես նշեցի՝ շատերը իսկապես բարդութավորվում են իրենց հայկական քթերից: Ի՞նչ եք կարծում, ինչպե՞ս կարելի է պայքարել նման հիվանդագին մոտեցման դեմ:

-Իհարկե, այդ խնդրին երբեք չպետք է հիվանդագին մոտենալ: Այս պարագայում պետք է հիշել նաեւ, որ հնարավոր է մի խնդրից ազատվելով՝ ձեռք բերեն մեկ այլ խնդիր, այս պարագայում՝ մեծ քիթը վիրահատելով կարող են ձեռք բերել արհեստական քիթ, ինչը չի սազում դիմագծերին: Այս պարագայում վիրաբույժը պետք է ուշադիր լինի եւ չափավոր գործի, քանի որ չափն անցնելու դեպքում կլինեն եւ ֆունկցիոնալ, եւ էսթետիկ խնդիր: Միշտ պետք է շեշտը դնել ճիշտ ֆունկցիայի եւ ներդաշնակ արտաքինի, բնական տեսք հաղորդելու վրա: Յուրաքանչյուր իր գործը հարգող բժիշկ առաջին հերթին կատարում է ձեւի շտկում, հետո նոր միայն փոքրացում: Բժիշկը պետք է մի փոքր էլ հոգեբան լինի, նա պետք է կարողանա իր հաճախորդին ճիշտ խորհուրդ տա, կոնկրետ ես ոչ բոլորին եմ վիրահատում: Օրինակ` օրեր առաջ ԱՄՆ-ից մի աղջիկ էր եկել ինձ մոտ, ով այդքան երկար ճանապարհ էր կտրել հատուկ վիրահատություն իրականացնելու համար, սակայն ես կարողացա համոզել նրան ընդհանրապես չվիրահատվել, քանի որ այդպես կկորցներ իր հմայքը: Երբեմն, աղջիկները կարող են դառնալ պլաստիկ վիրահատությունների գերին, սակայն այդ պարագայում գոնե բժիշկը պետք է կարողանա ճիշտ ուղու վրա դնել նման հաճախորդներին: Չէ որ բժշկին յուրաքանչյուր հաջող վիրահատություն պատիվ է բերում:

-Պլաստիկ վիրահատությունների մասին խոսելիս՝ չեմ կարող չանդրադառնալ գնային քաղաքականությանը, որը ոչ միշտ է բոլորի գրպաններին հարմար:

-Եթե գնահատեմ Հայաստանում գործող ամենաակտիվ վիրահատություններ կատարող մոտ 10 բժիշկների գործունեությունը, ապա կարելի է նկատել, որ քթի պլաստիկ վիրահատությունը Հայաստանում արժե միջինը 500 հազար դրամ: Ինչ վերաբերվում է մարդկանց գրպաններին հարմար լինելուն՝ կոնկրետ մեր կլինիկայում գործում է ապառիկ համակարգ, ինչի շնորհիվ առանց տոկոսադրույքի հնարավոր է իրականացնել քթի պլաստիկ վիրահատություն: