Քչախոս էր, բառի գինը գիտեր. Տեղի ունեցավ գիտնական Հրաչյա Թամրազյանի հոգեհանգիստը (ֆոտո)

Երեւանի Սուրբ Սարգիս եկեղեցում այսօր` սեպտեմբերի 5-ին, տեղի ունեցավ Մատենադարանի տնօրեն, գիտնական Հրաչյա Թամրազյանի հոգեհանգստի արարողությունը:

Անվանի բանաստեղծին հրաժեշտ տալու էին եկել ոչ միայն հարազատներն ու ընկերները, այլեւ գործընկերները, մտավորականներ, քաղաքական գործիչներ:

Մտավորականների բնութագրմամբ` Հրաչյա Թամրազյանը բացառիկ անձնավորություն էր եւ Մատենադարանի աղն ու մերանն էր: Կինոգետ Դավիթ Մուրադյանն ընդգծեց` Հրաչյա Թամրազյանը դեռ ապրելիք ու գրելիք ուներ:

«Հրաչյա Թամրազյանը քչախոս էր, բառի գինը գիտեր, այդ պատճառով էլ գրի մեջ բառն իմաստավորվում էր: Վաղուց էի ճանաչում Թամրազյանին, մենք բոլորս մի ուսուցչի սաներ ենք, գրական խմբակ ունեինք, որտեղ հավաքվում էինք, Հրաչյան պայծառ պատանյակ էր եւ դեռ այդ տարիներին ուշադրության կենտրոնում էր, գիտնականի եւ պոետի հետաքրքիր համադրությամբ»,- ասաց Դավիթ Մուրադյանը:

Կինոգետի բնորոշմամբ` Թամրազյանը ժրաջան էր աշխատասեր, իսկ գիտնականի համար համարյա երիտասարդ էր եւ դեռ շատ անելիքներ ուներ, որոնք ցավոք, չհասցրեց:

Բանաստեղծ, գրականագետ Հենրիկ Եդոյանն էլ երկակի զգացմունքներ ունի. Հրաչյա Թամրազյանի աշխատանքները մնացել են եւ միշտ կհիշեցնեն նրա մասին, միեւնույն ժամանակ իրենք կորցրեն նման բացառիկ մարդու:

«Երբ գրողը հեռանում է, նրա գործերը մնում են, սակայն այս դեպքում ես երկակի ապրումներ ունեմ, որովհետեւ մենք մեծ մարդու կորցրինք»,- ասաց նա:

Նշենք, որ Հրաչյա Թամրազյանի հուղարկավորությունը տեղի կունենա սեպտեմբերի 6-ին:

Թամրազյանը մահացել է սեպտեմբերի 1-ի լույս 2-ի գիշերը:

Գիտնական, բանաստեղծ, թարգմանիչ Հրաչյա Թամրազյանը ծնվել էր 1953թ. դեկտեմբերի 5-ին: 1977 թ. աշխատանքի է անցել  Մատենադարանում` նախ որպես ավագ լաբորանտ, ապա կրտսեր ու ավագ գիտաշխատող։ 1988-91 թթ. Հրաչյա Թամրազյանը աշխատել է «Սովետական գրող» հրատարակչությունում՝ որպես գլխավոր խմբագիր, իսկ 1991-93 թթ. զբաղեցրել է «Նաիրի›› հրատարակչության տնօրենի պաշտոնը։ 1993 թ. նշանակվել է ՀՀ կառավարությանն առընթեր Հրատարակչական գործերի վարչության պետ, իսկ 1995-1997 թթ. ղեկավարել է ՀՀ Տեղեկատվության նախարարությունը։

Հրաչյա Թամրազյանը 1997-2007 թթ. համատեղությամբ աշխատել է որպես «Նաիրի» հրատարակչության տնօրեն և Մատենադարանի ավագ գիտաշխատող։ 1999 թ. ստացել է բանասիրական գիտությունների դոկտորի գիտական աստիճան։ 2007 թվականից զբաղեցնում է Մատենադարանի տնօրենի պաշտոնը։ 2014 թվականից Հայաստանի գիտությունների ազգային ակադեմիայի թղթակից անդամ է:

Թամրազյանը բազմաթիվ մենագրությունների և գիտական հոդվածների ու ուսումնասիրությունների հեղինակ է։ Նրա ուսումնասիրությունները հիմնականում առնչվում են միջնադարագիտության՝ մասնավորապես նարեկացիագիտության բնագավառին։