2015թ 106 371 ընտանիք ամսական ստացել է միջինում 30 350 դրամ ընտանեկան և սոցիալական նպաստ. ԱՎԾ

ԱՎԾ-ն տարեսկզբին հրապարակել է նպաստառուների թվաքանակի և նպաստների միջին չափերի ցուցանիշները ՀՀ-ում 2015թ-ի դրությամբ։ Ըստ այդմ՝ 2015թ. տարեվերջին ընտանեկան և սոցիալական նպաստներ ստացող ընտանիքների թիվը կազմել է 106 371, որի 75.6%-ը բաժին է ընկել ընտանեկան նպաստ ստացող ընտանիքներին:

Մեկ ընտանիքի ամսական նպաստի միջին չափը կազմել է 30 350 դրամ: Մինչև 2 տարեկան երեխաների թիվը, որոնց համար նշանակվել է նպաստ, տարեվերջին կազմել է 12 611, նշանակված ամսական նպաստի չափը՝ 18 000 դրամ:

Ըստ ներկայացված ցուցանիշերի՝ ընտանեկան նպաստ ստացող ընտանիքների թվով ամենահագեցածը Լոռու մարզն է՝ 15 072 ընտանիք, այնուհետև Գեղարքունիքը՝ 11 825, ապա Շիրակի մարզը՝ 11 692 ընտանիք: Նպաստ ստացող ընտանիքներն ամենաքիչը Վայոց Ձորից են՝  1 520 ընտանիք:

Ինչ վերաբերում է սոցիալական նպաստ ստացող ընտանիքներին՝ ամենամեծ թիվը կազմում են Երևանում՝ 7 315 ընտանիք, ապա Լոռու մարզում՝  5 247 ընտանիք, որից հետո Շիրակը՝ 3 566 ընտանիք: Սոցիալական նպաստառուներն ամենափոքր թիվն են կազմում Վայոց Ձորում՝ 492 ընտանիք:

Իսկ եռամսյակային հրատապ օգնություն ստացող ընտանիքների թվով առաջինը Լոռին է՝ 2 045, ապա Երևանը 1 612, Գեղարքունիքը՝ 1 417, որին չնչին տարբերությամբ զիջում է Շիրակը՝ 1 406 ընտանիք:

Ծերության, հաշմանդամության և կերակրողին կորցնելու դեպքում նպաստների ցուցանիշներով  2015թ. տարեվերջին նպաստ ստացողների (նպաստառուների) թիվը եղել է 63 355 մարդ, նպաստի միջին չափը՝ 17 833.2 դրամ:

2015թ. տարեվերջին երեխայի ծննդյան միանվագ նպաստ ստացել է 44 957 ընտանիք, նշանակված նպաստների քանակը կազմել է 45 261: