Եռյակի սպասող Նորա Գրիգորյանը հղիության վերջին ամիսներն է վայելում

Լife.panorama.am-ը գրում է . 

Կ. Ստանիսլավսկու անվան ռուսական դրամատիկական թատրոնի գեղարվեստական ղեկավար և գլխավոր ռեժիսոր Ալեքսանդր Գրիգորյանի դուստրը և դերասան Էրվին Ամիրյանի կինը՝ դերասանուհի Նորա Գրիգորյանի հղիության մասին Life.panorama.am - ն առաջինն է պատմել , իսկ այսօր, երբ եռյակի սպասող մայրիկը հղիության 7-րդ ամսում է գտնվում, մեզ հետ կիսվել է հույզերի, իր ու ամուսնու անհամբերության և երջանկության մասին:

-Նորա, հղիության վերջին ամիսներում եք գտնվում, զգացողություններն ինչպիսի՞նն են:

- Ահագին ծանրացած եմ, միաժամանակ՝ երկու անգամ ավելի երջանիկ: Ամեն անգամ փորիկումս շարժ զգալուց հետո անասելի երջանկություն եմ զգում: Եթե փորձեմ վերարտադրել զգացածս, ապա պետք է նշեմ, որ ներսումս սեր, սեր և միայն սեր եմ զգում: Ի դեպ՝ ընտանիքիս անդամները փորձում են անել ամեն հնարավորն ու անհնարն ինձ երջանկացնելու և հոգսերս թեթևացնելու համար:

-Շուտով  Ձեր ընտանիքը կավելանան միանգամից երեք անդամով. Ձեզ եռյակի մայրիկիկարգավիճակում պատկերացնո՞ւմ եք:

- Իհարկե, դեռ չեմ պատկերացնում, թե ինչպես եմ հասցնելու երեքին էլ խնամել, բայց վստահ եմ՝ թե մայրս, թե սկեսուրս ինձ հավատարիմ օգնականներ կլինեն: Ինչպես ասում են՝ կարևորը գիժ ռիթմին սովորելն է, ինչը մարդու բնության մեջ կա, այնպես որ համոզված եմ, որ կհարմարվեմ ու կհասցնեմ բոլորին հավասար սեր, խնամք և ուշադրություն տալ:

-Նորա, ասում են, թե հղիության ընթացքում կանայք փոխվում են, հետաքրքիր է՝ Ձեր մեջզգո՞ւմ եք փոփոխություններ:

- Փոփոխություններն առաջինը շրջապատս սկսեց նկատել: Նախ` արտաքինս է շատ փոխվել, հաճախ եմ լսում, թե գեղեցկացել ու նրբացել եմ, թեպետ որպես բեմի մարդ՝ ինձ համար ավելորդ քաշ հավաքելը սարսափելի էր թվում: Սակայն, երբ լսեցի նրանց սրտիկների բաբախները, հասկացա, թե ինչ մեծ ու նոր աշխարհ է իմ մեջ հասունանում, սկսեցի սիրել նրանց, ինչն էլ փոխեց վերաբերմունքս հղիության ու քաշ հավաքելու նկատմամբ:

-Հետաքրքիր է նաև ամուսնու հոգեվիճակը, անհամբե՞ր է փոքրիկների հետհանդիպմանը:

-Հաճախ եմ խոսում Էրվինի հետ. վերջերս անհամբեր ենք դարձել, միասին նստում ենք ու սկսում պատկերացնել, թե ինչպիսի՞նն են նրանք, ի՞նչ բնավորության գծեր ունեն, ո՞ւմ են նման: Արդեն ուզում ենք հնարավորինս շուտ տեսնել մեր փոքրիկներին, գրկել, սեր ու ջերմություն տալ: Ամուսինս երկար է սպասել բալիկներին, իսկ ես տեսնելով, թե որքան երջանիկ է նա, ինքս էլ եմ վարակվում այդ երջանկությամբ: Անգամ զգացել եմ, որ ինձ նայելիս՝ Էրվինի հայացքը փոխվել, ամեն անգամ հայացքն ինձ գցելիս մի ջերմ խոսք է ասում: Ես համոզված եմ, որ ամուսինս լավ ու օրինակելի հայր է լինելու:

 -Նորա, արդեն ճշտե՞լ եք բալիկների սեռը: Այդ առումով Ձեր ընտանիքում ի՞նչվերաբերմունք կա:

-Սեռերը գիտենք, սակայն մինչև ճշտելն էլ որևէ վերաբերմունք այդ առումով չի եղել: Նրանք սիրված են՝ լինեն աղջիկ, թե տղա: Մենք ուզում ենք, որ մեր բալիկներն առողջ ծնվեն, դա մեզ համար ամենակարևորն է:

 -Մի բան է մեկ բալիկի անվան ընտրությունը, մեկ այլ բան միանգամից երեքը.անուններն արդեն ընտրե՞լ եք:

- Իրականում որոշել ենք հեռու մնալ թե սեռերը, թե անունները հրապարակելուց: Միայն կարող եմ ասել, որ իմ ու ամուսնուս համատեղ որոշմամբ է եղել անունների ընտրությունը. քանի որ հղիությունս բազմապտուղ է, անունների որոշումը հեշտությամբ է կայացվել:

-Հղիության ընթացքում ամենահաճելի զբաղմունքը, թերևս, խնամքի հետ կապվածգնումներն են, արդեն սկսե՞լ եք այդ հաճելի շրջանը:

- Այդ գնումների հաճույքը տրվել է մայրիկիս: Հիմա ամեն ինչից այնքան շատ է, որ վախ կա չհասցնել այդ ամենը հագցնել բալիկներին: Մայրս շատ է սիրում shoping-ով զբաղվել, իսկ թոռնիկների համար shoping-ը գերագույն հաճույք է նրա համար: Նա ոչ մի մանրուք բաց չի թողել, նույնիսկ այնպիսի բաներ է գնել, որոնք, երևի, երբեք պետք չգան: Իսկապես շնորհակալ եմ մայրիկիս նման վերաբերմունքի համար: Նաև չեմ կարող չնշել, թե գնումներից հետո ինչ երջանկությամբ ու լավ տրամադրությամբ էին մայրս ու սկեսուրս դասավորում դրանք. Նրանց ժպիտները ինձ լավ էմոցիաներ են հաղորդել, ուրախ եմ, որ բալիկներս այդքան մեծ սիրո ծնունդ են:

-Նորա, արդեն անցել եք դեկրետային դադարին, ծրագրերն ինչպիսի՞նն են` բալիկների ծնունդից հետո դադարը երկա՞ր կտևի:

-Կարծում եմ՝ դադարը կլինի այնքան, ինչքան պետությունն է հատկացնում: Ծրագրերս շատ են՝ թե հայրիկիս նոր ներկայացումը՝ Օստրովսկու «Ամպրոպը», թե ամուսնուս պլանները, ես էլ կփորձեմ ամեն տեղ հասցնել լինել: Ճիշտ է դժվար կլինի, բայց ես ուզում եմ թատրոնում էլ լավ օգնական լինել, զարգանալ որպես ռեժիսոր, չէ որ այդքան նոր էմոցիաներ են կուտակվելու և կարիք է լինելու դրանք արտահայտել, իսկ արվեստագետի դեպքում այդ էմոցիաների արտահայտման հրապարակը բեմն է: