ՀՅԴ-ն համերգ-հավաք է արել. 200 հոգի դաշնակցական են դարձել (ֆոտո)

Երեւանի Օպերայի եւ բալետի ակադեմիական թատրոնի դահլիճում սեպտեմբերի 2-ին կայացել է ՀՅԴ քաղաքական հավաքը՝ ի զորակցություն Արցախի պետականության: Միջոցառումը սկսվել է մեկ րոպե լռությամբ՝ ի հիշատակ ապրիլյան պատերազմում զոհված հերոսների, ապա ներկայացվել է Արցախի նախագահ Բակո Սահակյանի տեսաուղերձը:

Ելույթ է ունեցել ՀՅԴ Հայաստանի Գերագույն մարմնի ներկայացուցիչ Արմեն Ռուստամյանը, ով ընդգծել է, թե անհրաժեշտ է ամրապնդել այն գաղափարը, որ Արցախի ազատագրված տարածքները ոչ թե բեռ են, որից պետք է օր առաջ ազատվել, այլ զարգացման մեծագույն հնարավորություն: «Պետք է ունենալ այն մշտական համոզումը, որ ավելի լավ է լինել շրջափակված, բայց պահպանել ներկա 42000 քառ. կմ տարածքները հայկական, քան ունենալ բաց սահմաններ, բայց զրկվել կենսական նշանակաթյան մեր տարածքներից»,- նշել է նա:

Ըստ Ռուստամյանի, Հայաստանի ու Արցախի մարտավարական սկզբունքը Ադրբեջանի հետ հակամարտությունը կարգավորելու գործընթացում հստակ է ու հասկանալի՝ պատրաստ լինելով պատերազմի, խուսափել պատերազմից եւ մնալ փոխադարձ վեճերն ու խնդիրները առանց ուժի կամ դրա սպառնալիքի կիրառմամբ լուծելու միջազգայնորեն ընդունված չափանիշների եւ նորմերի շրջանակում: «Իսկ այդպիսի խաղաղ կարգավորման  միակ միջոցը բանակցություններն են, որից հրաժարվելը չի բխում մեր շահերից: Սակայն բանակցությունների միջոցով հիմնախնդրի արդար լուծումն ապահովող հայկական կողմերի հետապնդած հայեցակարգը պետք է հենվի Արցախի ժողովրդի արտահայտած կամքի վրա, ենթադրի Ադրբեջանի կողմից միաժամանակյա եւ համաչափ զիջումներ եւ լինի համահունչ խաղաղ կարգավորման միջազգային նորմերին ու չափանիշներին»,- ասել է Ռուստամյանը:

Նրա ելույթից հետո համերգ է եղել, որից հետո 200-ից ավելի անձինք` տարբեր տարիքի, հանդիսավոր երդվել են Զորավար Անդրանիկի անձնական զենքի եւ Խանասորի արշավանքի դրոշի վրա, համալրել Դաշնակցության շարքերը: