Քրեակատարողական վարչությունը մերժել է Թաթուլ Թամրազյանին քաղաքացիական հիվանդանոց տեղափոխելու միջնորդությունը

Քրեակատարողական վարչությունը մերժել է «Սասնա ծռեր» խմբի անդամ Թաթուլ Թամրազյանի փաստաբան Մոնիկա Մարգարյանի՝ իր պաշտպանյալին «Դատապարտյալների հիվանդանոցից» քաղաքացիական հիվանդանոց տեղափոխելու դիմում-միջնորդությունը: NEWS.am-ի հետ զրույցում փաստաբանը նշեց, որ իր պաշտպանյալին 2-3 ամիս անց նորից կվիրահատեն. «Հարցում էի արել «Էրեբունի» հիվանդանոց, պատասխանել են, որ երկրորդ՝ վերականգնողական վիրահատության անհրաժեշտություն կլինի: Ես դիմելու եմ, որ նրան քաղաքացիական հիվանդանոցում վիրահատեն, որովհետեւ «Դատապարտյալների հիվանդանոցում» անկախ այնտեղի պայմաններից, չկան այնպիսի բուժսարքավորումներ, բուժանձնակազմ, ինչ կա քաղաքացիական հիվանդանոցի վերակենդանացման բաժանմունքում: Այդ հարցով դիմում-միջնորդություն էի ներկայացրել քրեակատարողական վարչություն, որպեսզի իմ պաշտպանյալին տեղափոխեն քաղաքացիական հիվանդանոց, սակայն, մերժեցին»:

Մոնիկա Մարգարյանը նշեց, որ Թաթուլ Թամրազյանն իրեն համեմատաբար լավ է զգում, բողոքներ չունի «Դատապարտյալների հիվանդանոցի» բուժանձնակազմից եւ իր հիվանդասենյակի պայմաններից:

«Առողջական վիճակը նույնն է, փոփոխություն չկա: Սենյակի պայմաններից, ցուցաբերվող բուժօգնությունից պաշտպանյալս բողոքներ չունի: Բազմիցս հարցրել եմ, ինքը որեւէ բողոք չի ներկայացրել ոչ հիվանդասենյակի պայմանների հետ կապված, ոչ էլ բուժանձնակազմի»,-ասաց նա:

Թաթուլ Թամրազյանին մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) եւ 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը), 218-րդ հոդվածով՝ (պատանդ վերցնելը):

Հիշեցնենք, որ Թաթուլ Թամրազյանը վիրավորվել էր հուլիսի 17-ին՝ ոստիկանության ՊՊԾ գունդը գրոհելու ընթացքում տեղի ունեցած փոխհրաձգության ժամանակ:

Նյութի աղբյուր՝ NEWS.am