Արտահանման դժվարության պատճառով կարտոֆիլը սարսափելի էժանացել է. գյուղնախի նախկին աշխատակից

Վերին Լարսում առաջացած կուտակումները հուլիսին խոչընդոտել են Հայաստանից Ռուսաստան վաղահաս կարտոֆիլի արտահանմանը: Արդյունքում Հայաստանի շուկայում ապրանքի կուտակում է առաջացել, եւ գները սարսափելի ընկել են: Այս մասին NEWS.am-ի թղթակցին ասաց Գյուղատնտեսության նախարարության նախկին աշխատակից, «Սերմնաբույծ» ՍՊԸ տնօրեն Վռամ Գյուլզադյանը:

2015 թվականին ուտելի կարտոֆիլի 1 կգ-ը շուկայում 140-150 դրամ արժեր, իսկ հիմա՝ 70-80: Անասնակերի կարտոֆիլի 1 կգ-ն արժեր 45-50 դրամ, իսկ հիմա՝ ընդամենը 20-30 դրամ:

Ամռանը Հայաստանից Ռուսաստան սովորաբար վաղահաս կարտոֆիլ է արտահանվում: Արտահանումը պետք է հասցնել իրականացնել մինչ այն ժամանակը, երբ Ռուսաստանի հարավում կհասունանա ռուսական կարտոֆիլը: «Այնպես որ, մենք 2-3 շաբաթվա «պատուհան» ենք ունենում: Դրանից հետո արտահանես, թե ոչ՝ ոչ ոք չի գնի: Այս տարի Վերին Լարսը փակ էր հենց այդ ժամանակահատվածում (Թերեքի հեղեղման պատճառով)»,- պարզաբանեց Գյուլզադյանը:

Արդյունքում մոտ 1,5 – 2 հազար տոննա կարտոֆիլ մնաց Հայաստանում: Այն էժանացավ՝ աղետ դառնալով լեռնային շրջանների գյուղացիների համար, ում ցանած կարտոֆիլը աշնանն է հասունանում: Սակայն, եթե Արարատյան դաշտավայրի գյուղացիները չեն ապրում միայն կարտոֆիլից ստացվող եկամուտի հաշվին, այլ նաեւ պտուղ-բանջարեղենի, ապա լեռնային շրջաններում կարտոֆիլը շատերի միակ վաստակն է: Այդ իսկ պատճառով գների այսպիսի կտրուկ անկումը նրանք չեն կարող հաղթահարել:

«Մենք ցանկանում ենք պայմանավորվել, որ գյուղացիները գոնե մի քանի օր կարտոֆիլը չվաճառահանեն, որպեսզի այն մի փոքր թանկանա: Այլապես գյուղացին ինչպե՞ս ապրի: Սակայն այսպիսի դեպքերում գլխավորն այն է, որ կառավարությունը պետք է օգնի արտահանման հարցում, այլապես մեծ թվով մարդիկ առանց միջոցների կմնան: Եթե լեռնացքը փակվի, թող լաստանավով օգնեն կամ մեկ այլ եղանակով, որ թեկուզ ինչ-որ բան հաջողվի արտահանել»,- հավելեց Գյուլզադյանը:

Նշենք, որ մաքսային վիճակագրության համաձայն, եթե 2015-ի առաջին կիսամյակում Հայաստանից արտահանվել է 3,77 հազար տոննա կարտոֆիլ, ապա 2016-ի նույն ժամանակահատվածում՝ ընդամենը 1,36 տոննա:

Նյութի աղբյուր՝ NEWS.am