Ադրբեջանահայության փախստականների խնդիրները ՄԻԵԴ-ի վճռից հետո կարևոր ընթացք կստանան. Լ. Ալավերդյան

Tert.am-ը գրում է.

ՄԱԿ-ի կողմից հունիսի 20-ը ճանաչվել է Փախստականների միջազգային օր: Լրագրողների հետ հանդիպմանը «Ընդդեմ իրավական կամայականությունների» ՀԿ գործադիր տնօրեն, ՀՀ մարդու իրավունքների նախկին պաշտպան Լարիսա Ալավերդյանը օրվա առիթով նկատեց, թե փախստականների թիվը արագ տեմպերով աճում է, որը մեկ տարվա ընթացքում ավելացել են շուրջ 8 մլն-ով:

Ալավերդյանը վկայակոչելով Փախստականների միջազգային օրվա առիթով՝ ՄԱԿ-ի հանձնակատարի ամենամյա հայտարարությանը, նկատեց, թե այս անգամ այն աչքի է ընկել ծայրահեղ անհանգստությամբ:

«Այդ հայտարարությունն այն մասին էր, որ երբևիցե չի եղել փախստականների թվի այսքան մեծ տեմպով աճ: Եթե տասը տարի առաջ փախստականների թիվն  աշխարհում կազմում էր 51 մլն-ից մի փոքր ավելի, ապա միայն 2014թ-ի վերջին տվյալներով 59 մլն-ից ավելի է: Նաև նշվում է, որ  եթե 2003-2013թթ-ը աճը եղել է 31-ից 38 մլն, ապա մեկ տարվա մեջ այն 51 մլն-ից դարձել է 59 մլն»,- ասաց նա:

Լարիսա Ալավերդյանը հավելեց հանձնակատարի հստակեցումը, որ ըստ էության, մեր ժամանակներում իշխանությունները, կառավարությունները ոչ միայն չեն կարողանում լուծել այս խնդիրները, այլև չեն էլ կարողանում դադարեցնել կոնֆլիկտները: «Պարզապես գրված է ՝ «մենք ապրում ենք կոնֆլիկտների թվի աճի պայմաններում»»,- ասաց նա:

Լարիսա Ալավերդյանն ասաց, որ աշխարհի յուրաքանչյուր 122-րդ անձ փախստական է, և եթե աճը շարունակվի, ապա կստացվի, որ երկրագնդի բնակչության 1%-ը փախստականի կամ ներքին տեղահանվածի կարգավիճակում է: 

Բանախոսը շեշտեց, որ ամենից շատ փախստականները Սիրիայից են՝ որոնցից 1,3 մլն-ն  ընդունել է միայն Թուրքիան:

«Ընդդեմ իրավական կամայականությունների» ՀԿ գործադիր տնօրենը խոսեց նաև ադրբեջանահայության փախստականների խնդրից  ու ՄԻԵԴ-ի օրերս կայացրած վճռից:

«Բոլորը տեսնում են այն միտումը, որ հավասարության մթնոլորտի մեջ մի կարևոր խնդիր է դիտարկվել, որ երբ էլ դա տեղի է ունեցել և թեկուզ ՀՀ-ն ու Ադրբեջանն այդ իրավասության տակ են մտել դեռ 2000-ականների սկզբից, այդուհանդերձ նշում է դատարանը, որ դա չի նշանակում, թե հարցը կորցրել է արդիականությունը կամ ժամկետը այդ դիմումների կողմից ու դիտարկել է գործը»,-  ասաց նա ու ներկայացրեց վճիռը, որ երկու պետություններին էլ պարտադրվել է մեկ տարվա ընթացքում գտնել որևէ  լուծում, այլընտրանքային տարբերակ:

Իսկ թե ինչքան է դիմումների թիվը, Լարիսա Ալավերդյանը նշեց, թե ավելի քան 1000 դիմում է ներկայացված, որոնցից ըստ իր տեղեկության՝ 400-ը Ադրբեջանի քաղաքացիներն են, 600-ից ավելին՝ Հայաստանի:

ՄԻԵԴ-ի վճիռները, ըստ ՀԿ նախագահի, ծանրակշիռ են: «Այնպես որ ադրբեջանահայության խնդիրները կարևոր ընթացք կստանան»,- ասաց նա:

Իսկ թե, ըստ նրա, որը կլինի այդ այլընտրանքային լուծումը՝ Լարիսա Ալավերդյանը նշեց, որ  իրավասու չէ այդ հարցին պատասխանել: