ՄԱԿ-ի ներկայացուցիչն իսրայելա-պաղեսինյան բանակցությունների վերսկսման հեռանկար չի տեսնում

Իսրայելա-պաղեստինյան խաղաղ բանակցությունների վերականգնման որեւէ հեռանկար չկա, իսկ երկու պետությունների մասին լուծում գտնելու հույսը մարում է: Այս մասին ՄԱԿ-ի Անվտանգության խորհրդում ունեցած ելույթում հայտարարել է մերձավորարեւելյան խաղաղ գործընթացի հարցերով ՄԱԿ-ի հատուկ համակարգող Նիկոլայ Մլադենովը:

Նրա խոսքով՝ շարունակվում է «ապօրինի շինությունների կառուցումը, Գազան մնում է Պաղեստինյան օրինական վարչակազմի վերահսկողությունից դուրս»: «Կողմերի քաղաքական ղեկավարները նախկինի պես քայլեր չեն ձեռնարկում, որոնք անհրաժեշտ են խաղաղության ձեռքբերման համար: Այսպիսին է իրականությունը: Երկու պետությունների մասին լուծում գտնելու հնարավորության շուրջ հավատը մարում է: Նման լուծման կողմնակիցների թիվն ավելի ու ավելի է պակասում ինչպես Իսրայելում, այնպես էլ Պաղեստինում»,- ասել է Մլադենովը:

Իր ելույթում նա ափսոսանք է հայտնել, որ Իսրայելը, անտեսելով միջազգային հանրության կոչերը, «ընդլայնում է պաղեստինյան գրավյալ տարածքներում բնակեցումը՝ ամրապնդելով վերահսկողությունն Արեւմտյան ափին»:

Նիկոյալ Մլադենովն ընդգծել է, որ ոչինչ չի կարող փոխել այն փաստը, որ բոլոր բնակավայրերը՝ անկախ այն հանգամանքից, դրանք իսրայելական օրենսդրությամբ օրինականացվել են, թե՝ ոչ, միջազգային իրավունքի տեսանկյունից անօրինական են մնում: