30-ամյակիս առավել շատ եմ սպասում, չէ որ հենց այդ տարիքում եմ մայրության պարգևը ստանալու. Արևիկ Ալավերդյան

Life 26 Օգոստոս, 2016 15:24

Օրեր առաջ երգչուհի Արեւիկ Ալավերդյանը իր ֆեյբուքյան էջում լուսանկար հրապարակեց ու հայտնեց` հրաշքի է սպասում: Երգչուհու սպասված փոքրիկը կծնվի այս տարվա դեկտեմբերին, իսկ մինչ այս Life.panorama.am-ին Արևիկը պատմել է իր ներսում կրող հրաշքի եւ անսահման երջանկության մասին:

«Արդեն հղության 6-րդ ամսում եմ գտնվում: Երբ իմացա, որ մայրիկ եմ դառնալու, անբացատրելի զգացողողություններ ունեցա, անսահման երջանկություն ու հուզմունք զգացի, որն այժմ բառերով չեմ կարողանա նկարագրել: Ամուսինս եւս շատ երջանկացավ, երբ իմացավ՝ հայրիկ է դառնալու: Երկուսս էլ շատ էինք ցանկանում ծնողներ դառնալ, ուստի հիմա մեր զգացածը անչափելի ու անբացատրելի է»,- պատմեց ապագա մայրիկը:

Արեւիկ Ալավերդյանը ամուսնուն արու զավակ կպարգեւի, թեպետ նրա խոսքով՝ իրենց ընտանիքում սեռային խտրականության հարց դրված չէ.

«Մեր առջանեկը տղա է, սակայն մեզ համար գլխավորը առողջ բալիկ ունենալն է, աղջիկ, թե տղա՝ երկրորդական հարց է»,- նշեց նա:

Արեւիկն ու ամուսինը անվան ընտրության հարցում դեռեւս վերջնական որոշում չեն կայացրել: Զույգը այս շրջանում զբաղված է հաճելի գնումներով.

«Երբ իմացանք բալիկիս սեռը, անմիջապես սկսեցինք նրա խնամքի հետ կապված գնումները: Սա ամենահաճելի շրջանն է»,- նկատեց երգչուհին:

Նոր կարգավիճակը Արեւիկին չի խանգարում ինքնաթիռ նստել եւ հաճախ գալ հայրենիք.

«Փառք Աստծո՝ ինքնաթիռի հետ կապված եւ այլ խնդիրներ ես ու փոքրիկս չունենք, այնպես որ բժշկի թույլտվությամբ կարողանում եմ ինքնաթիռով ինձ թռիչքներ թույլ տալ: Ավելի՝ շուտով կրկին կգանք սիրելի Երեւան, բայց այս անգամ հատուկ նպատակով»,- պատմեց Արեւիկն ու նշեց.

«Հոկտեմբերի 31-ին կտոնեմ 30-ամյակս: Մեծ ցանկություն ունեմ, որպեսզի հենց Երեւանում նշեմ տարեդարձս: Նոր կարգավիճակում նոր տարիքային շեմ եմ մուտք գործելու, սա ինձ համար շատ խորհրդանշական է, հետաքրքիր ու ոգեւորող: Հիմա 30-ամյակիս առավել շատ եմ սպասում, չէ որ հենց այդ տարիքում եմ մայրության պարգեւը ստանալու»:

Թեպետ արդեն մեծ տարածում են գտել երգչուհու նոր կարգավիճակի լուսանկարները, սակայն նրա խոսքով՝ առաջիկայում գեղեցիկ կարգավիճակը խորհրդանշող եւս մի քանի ֆոտոշարքեր կլինեն:

Իսկ վերջում հարցին Հայաստանում, թե Ֆրանսիայում կծնվի փոքրիկը, Արեւիկը պատասխանեց.

«Աստված առաջ՝ որդիս կծնվի դեկտեմբեր ամսին՝ Փարիզում»:

Հեղինակ՝ Անուշիկ Մելքոնյան