Մերձմոսկվայում տաքսու հայ վարորդը փրկել է երեխային այրվող ավտոմեքենայից

Ռուսաստանում՝ մերձմոսկովյան Սոլնեչկոգորսկում, տաքսու հայ վարորդը փոքր երեխային հանել է այրվող ավտոմեքենայից: Հրաշքով փրկված երեխան հիմա բուժում է ստանում հիվանդանոցում: «ՄԿ»-ին հայտնի է դարձել, որ 37-ամյա Վյաչեսլավը ու Սվետլանան իրենց երեխաների՝ 5-ամյա Անդրեյի ու 15-ամյա Զոյայի հետ միասին (անունները փոխված են) այդ օրը նոր տուն էին տեղափոխվում: Առհասարակ նրանք նորամուտը մոտ մեկ ամիս առաջ էին տոնել: Սակայն կահույքի մի մասը հին բնակարանում էր մնացել, ու ընտանիքի հայրը դրանք մաս- մաս էր տեղափոխում: Կինը աշխատավայրից զանգահարել էր ամուսնուն ու խնդրել բերել երեխաների իրերը: Անդրեյին նստացնելով ընտանեկան «Շեվրոլե Նիվայի» հետևի նստարանին, տղամարդը գնացել է իր հին բնակարան: Մեքենան կանգնեցնելով բակում՝ Վյաչեսլավը բարձրացել է բնակարան, իսկ երեխային թողել ավտոմեքենայում: Արդեն բնակարանում՝ Վյաչեսլավը պատահաբար պատուհանից տեսել է, որ իր մեքենան բոցերի մեջ է:

«Ես ավարտել էի պատվերս ու վերադառնում էի, երբ թիվ 12- տան մոտ տեսա «Նիվա», որից ծուխ էր դուրս գալիս,- այդ օրվա իրադարձություններն է հիշում տաքսու 38-ամյա վարորդ Արա Ջանասլանյանը, որը ծնունդով Հայաստանից է,- Մեքենայի շուրջ մարդիկ էին հավաքվել, բայց ոչ ոք ոչինչ չէր ձեռնարկում: Մարդիկ խոսում էին, որ մեքենայում կարծես երեխա կա: Լսելով այդ մասին՝ ես միանգամից մոտեցա մեքենային, բայց ծուխի պատճառով չէի կարողանում որևէ բան տեսնել, իսկ հետևի նստատեղում արդեն կրակ էր բռնկվել»:

Տղամարդը բացել է մեքենայի առջևի դուռը, բայց վարորդի ու ուղևորի նստատեղին ոչ մեկին չէր գտել: Այդ ժամանակ անձնվեր հայը որոշել է ստուգել «Նիվայի» հետևի նստատեղը, չնայած արդեն ինքն էր խեղդվում ծխից: Եվ... գտել է: Փոքրիկ Անդրեյը կուչ էր եկել ու թաքնվել առջևի նստատեղի տակ: Նա հազիվ էր շնչում, երբ Արան դուրս է բերել նրան այրվող մեքենայից: Անդրեյի առաջին բառերն էին. «Մի՛ ասեք հայրիկին, թե չէ նա ինձ վրա կբարկանա...»

Տուժած երեխային տարել են վերակենդանացման բաժանմունք, սակայն ավելի ուշ որոշել են նրան տեղափոխել Լյուբերցի քաղաքի այրվածքաբանական կենտրոն: Բժիշկները Անդրեյի մոտ 1-ին ու 2-րդ աստիճանի այրվածք են ախտորոշել: Հիմա երեխայի կյանքին ոչինչ չի սպառնում

Արան ինքը իր արարքը հերոսական չի համարում: Չնայած նա այրել է ձեռքերը, բայց հոսպիտալացումից հրաժարվել է: «Ես երկու որդիներ ունեմ՝ հինգ ու ութ տարեկան: Աշխատել է պետք: Մեքենաս վարձակալում եմ, բնակարանը՝ նույնպես, պետք է վճարեմ: Իսկ կինս մեզ լքել է մի քանի տարի առաջ: Դրա համար էլ ստիպված եմ մենակ մեծացնել որդիներիս՝ ինչպես կարող եմ»:

Հիմա ԱԻՆ մասնագետները փորձում են պարզել կատարվածի պատճառը: Հրշեջ ծառայության աշխատողնների նախնական վարկածով երեխան խաղացել է կրակայրիչի հետ, ինչի հետևանքով էլ մեքենան բռնկվել է: