«Վիքիմեդիա Հայաստանը» լավ օրինակ է աշխարհում գործող մյուս գրասենյակների համար. բացվեց ՀԿ-ի նոր գրասենյակը (լուսանկարներ)

Tert.am-ը գրում է.

«Վիքիմեդիա Հայաստան» գիտակրթական հասարակական կազմակերպությունը այսօրվանից իր գործունեությունը կծավալի բարեկարգ և տեխնիկապես զինված գրասենյակում, որի կյանքի կոչմանը աջակցել է «Ինտելեկտուալ ռենեսանս» հիմնադրամը, որի հիմնադիրն է ռուսաստանաբնակ հայ գործարար Արթուր Ջանիբեկյանը։

Ինչպես լրագրողների հետ զրույցում նշեց «Ինտելեկտուալ ռենեսանս» հիմնադրամի  տնօրեն Հակոբ Հակոբյանը, բացի գրասենյակը կահավորելուց ու վերանորոգելուց, իրականացրել են նաև մի շարք այլ նախագծեր, որոնցից են՝ «Մեկ հայ մեկ հոդված», «վիքիակումբներ» և այլ նախագծերը: 

««Մեկ հայ մեկ հոդված» նախագիծը բավական մեծ հաջողություն ունեցավ ոչ միայն Հայաստանում, այլ նաև ամբողջ աշխարհում, և նախագծին անդրադարձան միջազգային տարբեր լրատվամիջոցներ: Բայց խոսքը միայն նյութական ներդրման մասին չէ, որը թեև բավական մեծ է եղել, համագործակցությունը նաև ինտելեկտուալ դաշտում էր: Այդ համագործակցության շնորհիվ հայկական Վիքիպեդիայի էջում տեղադրվել են հազարավոր հոդվածներ, որոնց շնորհիվ մեր դիրքը բարելավել են մյուս էջերի շրջանակում»,-ասաց նա:

Հակոբ Հակոբյանի խոսքերով ներկայումս Վիքիպեդիայում հայալեզու հոդվածերի թիվը անցել է 170 հազ.-ի սահմանը:

«Վիքիմեդիայի» հիմնադրամի խորհրդի նախագահ Յան Բարտ դե Վրիդը նշեց, որ Հայաստանը շատ ակտիվ գոտի է: 

«Մենք գրասենյակներ ունենք ամբողջ աշխարհում, բայց «Վիքիմեդիա Հայաստանը» իսկապես լավ օրինակ է բոլորի համար, հատկապես իր յուրօրինակ նախագծերով՝ «Վիքիճամբարներ», «Վիքիակումբներ» և այլն: Թեև «Վիքիմեդիա Հայաստանը» ցանկանում է սովորել այլ Վիքիմեդիաներից, սակայն կարծում եմ, որ միջազգային հանրությունը պետք է սովորի Հայաստանից, քանի որ «Վիքիմեդիա Հայաստանը» շատ հրաշալի ծրագրեր ունի»,-ասաց նա։

«Վիքիմեդիա Հայաստան» ՀԿ-ի տնօրեն Սուսաննա Մկրտչյանն ասաց, որ ներկայումս Վիքիպեդիայի հայալեզու էջն ունի 40 հազ. գրանցված խմբագիրներ, որոնցից 600-ն ակտիվ աշխատում են: 

«Վիքիպեդիան կարող են խմբագրել բոլորը, բայց անպայման պետք է լինեն աղբյուրներ: Եթե սխալ ինֆորմացիա տեղադրվեց, մեկ ուրիշի կողմից կբացահայտվի: Յուրաքանչյուր մասնակից կարող է այդ հսկողությունն իրականացնել, բայց հոդվածը արգելափակել կարող են միայն ադմինները: Դուք շատ անելիքներ ունեք, լրագրողներ, որովհետև ամբողջ աշխարհում ամենաշատը խմբագրում են լրագրողները»,-ասաց նա: