ՄԱԿ-ի հատուկ զեկուցողը խոստովանել է կազմակերպության մեղքը Հաիթիում խոլերայի համաճարակի բռնկման համար

Հաիթիում հազարավոր մարդկանց կյանքեր խլած խոլերայի համաճարակի պատճառը ՄԱԿ-ի գործունեությունն է: Այս մասին նշված է ՄԱԿ հատուկ զեկուցողի փաստաթղթում, որն ուղարկվել է գլխավոր քարտուղար Պան Գի Մունի գրասենյակ: Այս մասին գրում է ՌԻԱ Նովոստին՝ վկայակոչելով New York Times-ը:

Առողջապահության համաշխարհային կազմակերպության տվյալներով՝ 2010-ին բռնկված խոլերայի համաճարակը ներառել է Հաիթիի շուրջ 700 հազար բնակիչների, որին զոհ է գնացել առնվազն 8.4 հազար մարդ: Տեղացիները հիվանդության աղբյուր են համարում Նեպալի զինծառայողներին, որոնց ՄԱԿ-ը Կարիբյան ծովի կղզի էր ուղարկել որպես խաղաղապահներ:

Պարբերականի տեղեկություններով՝ օգոստոսի 8-ին Պան Գի Մունին ուղարկված ամերիկացի իրավաբան Ֆիլիփ Էլսթոնի գաղտնի զեկույցում ուղղակիորեն հաստատվում է, որ Հաիթիում համաճարակը բռնկվել է «միայն ՄԱԿ գործողությունների պատճառով»:

Պարբերականը նշում է, որ Էլսթոնի փաստաթուղթը անկախ փորձագետի եզրակացություն է, որի եզրահանգումները ՄԱԿ ղեկավարությունը կարող է հերքել: Դրա հետ մեկտեղ արդեն այս շաբաթ գլխավոր քարտուղարի օգնական Ֆարհան Հաքը խոստովանել է «համաճարակի նախնական բռնկման մեջ ներգրավված լինելը», չնայած նախկինում ՄԱԿ-ը ժխտում էր հիվանդության հետ ցանկացած կապը:

«Նոր պատասխանը հրապարակավ կներկայացվի երկու ամսվա ընթացքում՝ վերջնամշակումից, Հաիթիի իշխանությունների հետ համաձայնեցումից եւ ՄԱԿ անդամ մյուս պետությունների հետ քննարկումից հետո»,- Ֆարհան Հաքի էլեկտրոնային նամակից մեջբերում է արել պարբերականը: