Անկեղծ եղեք, ասեք, որ եթե նոր պարտք չվերցնենք՝ շատ ավելի վատ է լինելու. Արամ Մանուկյան

Tert.am-ը գրում է.

ԱԺ «Հայ ազգային կոնգրես» խմբակցության քարտուղար Արամ Մանուկյանը ԱԺ-ում քննարկվող ««Պետական պարտքի մասին» ՀՀ օրենքում լրացումներ ու փոփոխություններ կատարելու մասին» ՀՀ օրենքի նախագծի քննարկմանը պահանջեց անկեղծ լինել և ասել, որ ֆինանսական ծանր պրոբլեմ կա, եթե նոր պարտք չվերցնեն շատ ավելի ծանր է լինելու: Նա նաև պահանջեց ներկայացնել այս նախագծի իրական հեղինակներին:

«Կառավարությունո՞ւմ էլ է էս հիմնավորումներով նախագիծն ընդունվել, ես խնդրում եմ ասեք՝ ով է իրական հեղինակը, որ նախարարությունից է եկել, որովհետև շատ կարևոր է, եթե էստեղ էլ եք ֆռռացնելու, որ տերմիների հստակեցման, վիճակագրության համար է: Կամ անկեղծ եղեք՝ ասեք, որ ֆինանսական ծանր պրոբլեմ կա, եթե չվերցնենք շատ ավելի ծանր է լինելու, որովհետև սա բովանդակություն է, ոչ թե ձև ու տերմիններ, չի կարելի ազնիվ չլինել ու ասել ընդամենն էս բաների համար ենք բերել»,- ասաց Մանուկյանը:

«Պա՞րզ չի, չգիտե՞նք, որ պարտքն ավելացնելու համար եք բերել, մեր նկատմամբ հարգանք ունեցեք՝ ասեք, որ էս օրենքի նպատակը լրիվ ուրիշ է»,- ասաց Մանուկյանը՝ դիմելով Ֆինանսների փոխնախարարին:

Պատգամավորի դիտարկումը զարմացրեց Ֆինանսների փոխնախարար Ատոմ Ջանջուղազյանին, և նա նկատեց, որ, ինչպես և ներկայացրել է, հեղինակը կառավարությունն է, իսկ կոնկրետ նախարարությունը, որը մշակել է նախագիծը՝ Ֆինանսների նախարարությունն է: «Ձեր՝ նախատինք ասեմ, հանդիմանանք, թե կշտամբանք, ճիշտ բառը կդժվարանամ գտնել, թե ինչ-որ բան ենք ուզում անել, ֆռռացնել, ինձ ուղղակի զարմացնում է»,- ասաց փոխնախարարը՝ հավելելով, որ փորձել է իր ամբողջ ելույթը կառուցել այնպես, որ օրենքի իրական նպատակը ներկայացնի:
Նշենք, որ ըստ Ֆինանսներ փոխնախարարի՝ օրենքը պետական պարտքի և կառավարության պարտքի ներդաշնակեցումն է: