Անկարան փախուստի դիմած 8 զինվորականներին արտահանձնելու հարցում է ուղարկել Հունաստան
Ուշադրության կենտրոնում
Թուրքիայի արդարադատության նախարարությունը Հունաստան հարցում է ուղարկել պետական հեղաշրջման փորձից հետո ուղղաթիռով այդ երկիր փախած 8 զինվորականներին արտահանձնելու մասին:
Հեղաշրջման փորձից հետո ութ զինվորականները Հունաստան էին փախել հուլիսի 20-ին: Նրանք ժխտում են խռովությանն իրենց մասնակցությունը եւ հայտարարում են, որ թաքնվել են իրենց կյանքի անվտանգության համար վախից: Ուղղաթիռը, որով փախստականները թռչել էին, Հունաստանի իշխանությունները վերադարձրել են Թուրքիային: Փախած զինվորականների թվում երեք մայոր են, երեք կապիտան եւ երկու ենթասպա:
«Արդարադատության նախարարությունը փախուստի դիմած ութ զինվորականների գործերն ուղարկել է Հունաստան», հայտնում է Cumhuriyet-ը։
Ավելի վաղ Ալեքսանդրուպոլիսի դատարանը զինվորականներին դատապարտել էր Հունաստան ապօրինի մուտք գործելու համար, սակայն նրանց թողել էին վարչական կալանքի տակ՝ մինչ կորոշվեր նրանց քաղաքական ապաստան տալու հարցը: Սպասվում է, որ օգոստոսի 19-ին եւ 23-25-ին տեղի է ունենալու հարցազրույց հույն դատախազների եւ կասկածյալների մասնակցությամբ: Թուրքիայի իշխանությունները բազմիցս հայտարարել են, որ սպասում են զինվորականների հանձնմանը:
1
2
3
4
5
1
2
3
4
5
1
3
4
