«Սասնա ծռերին» օժանդակելու համար կալանավորված ազատամարտիկի ընտանիքը լուրջ ֆինանսական խնդիրների առաջ է

«Սասնա ծռեր» խմբին օժանդակելու մեղադրանքով կալանավորված ազատամարտիկ Մհեր Մազմանյանի ընտանիքը՝ 6 անչափահաս երեխաներով, օգոստոսի 15-ին պետք է լքեն բնակարանը, որի վարձը վճարել չեն կարողանում, սակայն գնալու տեղ չունեն: Այս մասին NEWS.am-ի հետ զրույցում ասաց Մհեր Մազմանյանը կինը՝ Քրիստինե Մազմանյանը:

«Մեկ օր ժամանակ ունենք, որ տան հարցը լուծենք, դրսում չմնանք: Պետք է տեսնեմ՝ որտեղից եմ տուն գտնում»,- ասաց Քրիստինե Մազմանյանը:

Ընտանիքի ամենակրտսեր երեխան 6 տարեկան է: Նա այս տարի պետք է դպրոց հաճախի:

«Չգիտեմ էլ՝ կարամ դպրոց ուղարկել, թե չէ, պետք է հինգ երեխա ճանապարհեմ դպրոց»,- ասաց նա:

Ընտանիքում վերջին իրադարձությունները շատ բան են փոխել: Երեխաներից ամենաավագը՝ Մհերի 17-ամյա դուստրը, հոր ձերբակալությունից հետո հրաժարվել է համալսարան ընդունվելու մտադրությունից: Ընտանիքի ապրուստի միակ միջոցը մնացել է Մհերի 15-ամյա որդու՝ ավտոլվացման կետից օրական ստացած 1000-1500 դրամ աշխատավարձը: 

Հիշեցնենք, որ Մհեր Մազմանյանի փաստաբան Նիկոլայ Բաղդասարյանը դիմել է պատկան մարմիններին, որ պետությունն ըստ օրենքով սահմանված կետերի այս ընթացքում իր վրա վերցնի անչափահաս երեխաների ապրուստի միջոցը հոգալը, սակայն դեռ ոչ մի պատասխան չի ստացել:

Ըստ փաստաբանի՝ Մհեր Մազմանյանին մեղադրանք են առաջադրվել անհիմն՝ հիմնվելով միայն «Սասնա ծռեր» խմբի անդամների հետ ունեցած հեռախոսազանգի վրա: