Ծանր վիրավորված զինծառայողի հարազատները համոզված են՝ լեյտենանտը պատահաբար է կրակել

Արցախում, նախնական տվյալով, լեյտենանտի կրակոցից վիրավորված ժամկետային զինծառայող Ալբերտ Դալլաքյանը դեռեւս ցուցմունք չի տվել, քանի որ ի վիճակի չէ: Այս մասինNEWS.am-ին ասաց նրա հայրը՝ Արարատ Դալլաքյանը:

«Ավագ Նահապետյանը, որին մեղադրանք է առաջադրվել որդուս վրա կրակելու մեջ, հենց այն նույն սպան է, որի մասին մենք լսել էինք, որ հենց որդուս վրա կրակել է: Ինձ հրավիրել էին դատախազություն, ներկայացրել, որ այդ սպային մեղադրանք է առաջադրվել: Մենք կարծում ենք, որ պատահաբար է կրակել սպան: Երբ որդիս մեզ պատմի եղելությունը, դրանից հետո ամեն ինչ հստակ կլինի»,- ասաց Արարատ Դալլաքյանը:

Նշենք, որ դեպքի առթիվ քրեական գործ է հարուցվել Քրեական օրենսգրքի 373-րդ հոդվածի հատկանիշներով, այն է` զենքի, ռազմամթերքի, ինչպես նաև ռադիոակտիվ նյութերի, պայթուցիկ կամ շրջապատի համար առավել վտանգ ներկայացնող այլ սարքերի, առարկաների կամ նյութերի հետ վարվելու կանոնները խախտելը: Քրգործի շրջանակներում մեղադրանք է առաջադրվել լեյտենանտ Ա. Նահապետյանին:

Հիշեցնենք, որ ըստ Դալլաքյանի հարազատների` հունիսի 24-ին լեյտենանտն՝անզգուշություն է ցուցաբերել, զենքը մաքրելիս մատը կպել է, կրակել եւ վիրավորել է Ալբերտին: Ի դեպ, ի սկզբանե հայտարարվում էր, թե զինծառայողը վիրավորվել է հակառակորդի կրակոցից:

Ալբերտի վիճակը 20 օր շարունակ ծայրահեղ ծանր էր: Այժմ արդեն կայուն է, զինծառայողը տեղափոխվել է հիվանդասենյակ:

Դալլաքյանը բռնցքամարտիկ է, ՌԴ-ից մեկ տարի առաջ եկել էր՝ հատուկ Արցախում ծառայելու համար: