ՀԱՕԿ նախագահ Գագիկ Ծառուկյանը հանդիպել է Իրինա Ռոդնինայի հետ

Հայաստանի ազգային օլիմպիական կոմիտեի նախագահ Գագիկ Ծառուկյանն հանդիպել է լեգենդար գեղասահորդուհի, Օլիմպիական խաղերի եռակի, աշխարհի և Եվրոպայի բազմակի չեմպիոն Իրինա Ռոդնինայի հետ: Ինչպես տեղեկացրին ՀԱՕԿ լրատվական բաժնից, հանդիպումից առաջ ՀԱՕԿ գլխավոր քարտուղար Հրաչյա Ռոստոմյանը հյուրերի հետ շրջել է «Օլիմպավան»-ում: Լեգենդար գեղասահորդուհին հիացմունքով է շրջել տարածքով և ասել, որ նախանձում է Հայաստանի այս հարստությանը:

Հանդիպման ընթացքում Ռոդնինան նշել է, որ նրա անունով Երևանում բացված մարզադպրոցը ՀԱՕԿ նախագահի աջակցության կարիքն ունի:

«Ես միշտ հիացմունքով եմ հետևել Ձեր ծավալած գործունեությանը: Այս հրաշալի կառույցը ևս մեկ ապացույցն է այն բանի, որ Դուք անշահախնդիր կերպով եք սիրում հայկական սպորտը և ցանկանում եք այն զարգացնել: Եվ հենց այդ պատճառով է, որ մենք այժմ այստեղ ե նք: Ես շատ շնորհակալ եմ և զգացված, որ իմ անունով մարզադպրոց կա Երևանում: Հայկական գեղասահքը լավ ավանդույթներ է ունեցել և հիմա էլ կարծես նորից փորձում է վերածնունդ ապրել: Ցանկանում ենք վայելել Ձեր աջակցությունը, օգնությունը: Իսկ արդյունքներն էլ, հավատացեք ' չեն ուշանա»,-ասաց օլիմպիական չեմպիոնուհին:

Ի պատասխան Ռոդնինայի խնդրանքին' ՀԱՕԿ նախագահ Գագիկ Ծառուկյանը ասել է. «Բազմիցս ասել եմ, որ ես հայկական սպորտի կողքին եմ: Ինչով պետք է' ձեզ կաջակցենք և կօգնենք: Վստահ եղեք' Ձեր խնդրանքն ու դիմումն անպատասխան չեն մնա»: