Մատնահարդար Լիանա Ավետիսյանը՝ այս ամռան համար եղունգների լաքերի հիթային երանգների ու հարդարման տարբերակների մասին

Life.panorama.am-ը գրում է . 

Նորաձեւությանը հետեւել նշանակում է հետեւել  ոչ միայն թրենդային հագուստներին ու աքսեսուարներին, այլեւ վարսահարդարման ու մատնահարդարման սեզոնային թելադրանքներին:

Life.panorama.am-ի հետ զրույցում «LNail Studio»-ի մատնահարդար Լիանա Ավետիսյանը պատմել է այս ամռան համար եղունգների լաքերի հիթային երանգների ու հարդարման տարբերակների մասին:

«Նախ պետք է նշեմ, որ եղունգների լաքերի երանգները միշտ չէ, որ համընկնում են սեզոնի թրենդային գույների հետ: Օրինակ՝ հագուստի համար այս տարի այլեւս նորաձեւ չեն նեոնային գույները, բայց եղունգների համար այդ երանգները շարունակում են նորաձեւ մնալ: Եղունգների լաքերի համար այս տարի շատ նորաձեւ է այսպես կոչված էլեկտրիկ կապույտը, վառ նարնջագույնը, նեոնային ու նաեւ պաստելային երանգները: Գույների հետ կապված պետք է նշեմ նաեւ, որ մատնահարդարման համար 2016-ի ամռան նորաձեւության հիթ են համարվում օմբրեները, երբ գույների երկու երանգով է հարդարվում եղունգը, այս պարագայում հատկապես նուրբ ու գեղեցիկ է վարդագույնի բաց երանգից դեպ մուգ երանգ, կամ սպիտակից դեպի բաց վարդագույն համադրությունները»,- նշեց մատնահարդարն ու շարունակեց.

«Այս տարվա թրենդներից են համարվում հայելու տպավորություն ստեղծող փայլերը, որոնք եւս ընդգծվում են տարբեր գույներով: Նորաձեւ են նաեւ կիսալուսնաձեւ հարդարանքները, որի ժամանակ չներկված գիծ է թողնվում եղունգի վրա»:

Հարդարման ակտուալ տարբերակներից խոսելով՝ մատնահարդարը հայտնեց, որ երկրաչափական գծերն այլեւս հակաթրենդներ են համարվում:

Լիանան հայտնեց նաեւ, որ մատնահարդարման ասպարեզում եւս նորաձեւությունը ժամանակի ընթացքում կրկնվում է եւ այժմ կրկին նորաձեւ են սուր եղունգները, թեպետ ուղիղ կտրվածքները եւս շարունակում են պահպանել իրենց դիրքերը: