Ավտոմեքենան այրելու սպառնալիքով և իր հետ նախապես վերցրած ծխարձակող նյութն օգտագործելով, առևանգած աղջկանից ստացել է համաձայնություն…

Աղջկան կամ կնոջը կարելի՞ է պարտադրել սեր կամ ընկերական հարաբերություններ, ինտիմ կամ ոչ ինտիմ շփումներ, կարելի՞ է պարտադրել լինել կյանքի ընկեր: Ողջախոհ մարդուն ի սկզբանե պարզ է, որ դրանցից և ոչ մեկը պարտադրանքով չի կարող գլուխ գալ, հետևաբար այդ ուղղությամբ իր ցանկացած փորձ դատապարտված է ձախողման, անմիջապես կամ թեկուզ հետո, մեղմ ասած, աղմուկ է բարձրանալու: Սակայն, ցավոք, բոլորը չէ, որ գիտակցում են այս պարզ ճշմարտությունը:

Քրեական գործի նախաքննությամբ պարզվել է, որ Արման Գրիգորյանը 2015թ. սեպտեմբերի 5-ին, ժամը 09:00-ից 11:00-ի սահմաններում, իր վարած ՎԱԶ-2103 մակնիշի, 27ԼՕ 529 հաշվառման համարանիշի ավտոմեքենայով Արմավիրի մարզի Արտիմետ գյուղի գլխավոր ճանապարհին մոտենալով նույն մարզի բնակչուհի Ն. Հ.-ին, տաքսի ծառայություն մատուցելու պատրվակով, վերջինիս աշխատանքի վայր տեղափոխելու նպատակով, խաբեությամբ նստեցրել է նշված ավտոմեքենան և գաղտնի առևանգել:

Ըստ մեղադրական եզրակացության, Ա. Գրիգորյանն այդ ընթացքում ավտոմեքենայի դռները կենտրոնական փականով փակելով, Ն. Հ.-ի կամքը բացահայտորեն ճնշել և ցուցաբերած դիմադրությունը հաղթահարել է ավտոմեքենան այրելու սպառնալիքով և իր հետ նախապես վերցրած ծխարձակող նյութն օգտագործելով, որից հետո Ն. Հարությունյանի կամքը նշված միջոցներով ճնշելով, նրանից ստանալով իր հետ շփվելու համաձայնություն, դեպի Արմավիր քաղաք տանող ավտոճանապարհից վերջինիս վերադարձրել է Էջմիածին քաղաք և պատահական տաքսի ավտոմեքենայով ճանապարհել տուն:

Վերը նշված արարքի համար Արման Գրիգորյանին մեղադրանք է առաջադրվել ՀՀ քրեական օրենսգրքի 131-րդ հոդվածի («Մարդուն առևանգելը») 1-ին մասի հատկանիշով, որպես խափանման միջոց ընտրվել է կալանքը:

Ինչպես նշված է «Դատահոգեբուժական-դատահոգեբանական համալիր ստացիոնար փորձաքննություն նշանակելու վերաբերյալ հարուցված միջնորդությունը քննության առնելու մասին» դատարանի որոշման մեջ, Արման Գրիգորյանը կյանքի ընթացքում ունեցել է բարդություններ, որոնք արտահայտվել են հակառակ սեռի հետ շփման մեջ։ Դեռևս 2013թ. հոկտեմբերի 24-ին նա իր վարած հիշյալ ավտոմեքենայով առևանգել է Անահիտ Մարգարյանին, որի համար Արմավիրի մարզի ընդհանուր իրավասության դատարանի 24.12.2013թ. թիվ Արդ 0192/01/13 դատավճռով նույն արարքի' ամուսնության նպատակով աղջիկ փախցնելու համար ՀՀ քրեական օրենսգրքի 131-րդ հոդվածի 1-ին մասով դատապարտվել է 3 տարի ժամկետով ազատազրկման, սակայն 2015թ. ապրիլի 15-ին վաղաժամկետ պայմանական ազատ է արձակվել։