Տեսչական նոր համակարգ է ստեղծվում

Առաջինով նախատեսվում է հաստատել տեսչական մարմինների կառավարման խորհուրդների աշխատակարգի օրինակելի ձևը և խորհրդի անդամ՝ հասարակական և գիտական կազմակերպությունների ներկայացուցիչներին ներկայացվող ընդհանուր պահանջները և առաջադրման և թեկնածուներից խորհրդի անդամ ընտրելու կարգը։ Հաջորդ որոշմամբ հաստատման կդրվի տեսչական մարմինների էլեկտրոնային տեղեկատվական համակարգի ստեղծման, օգտագործման և վերահսկողություն իրականացնող մարմինների միջև տեղեկատվության փոխանակման, ինչպես նաև հանրությանը տեղեկություն տրամադրելու կարգը։

Կսահմանվի, որ համակարգի անվտանգության համար պատասխանատու անձ կնշանակի ՀՀ կառավարության աշխատակազմի ղեկավար- նախարարը։ Անվտանգության պատասխանատու անձը կվերահսկի համակարգից տեղեկության տրամադրման, տեղեկատվական համակարգի օգտագործողներին իրավասության տրամադրման և բաշխման գործընթացը։ Որոշմամբ նաև կսահմանվի, որ համակարգը պետք է ներառի տեղեկատվության ստեղծման, ակտիվացման, փոփոխման, կասեցման, հեռացման գործընթացն ապահովող ինքնաշխատ ծրագրեր։ Եվ վերջապես, տեսչական մարմինների գործունեության հետ կապված երրորդ որոշմամբ նախատեսվում է հաստատել հանրությունից ստացվող բողոքների ընդունման ընդհանուր կարգը և տնտեսվարող սուբյեկտներից բողոքների ստացման, հետագա ընթացքի և դրանց հետևելու կարգը։

Սահմանվելու է, որ սույն որոշման հիման վրա տեսչական մարմինների կառավարման խորհուրդներն ընդունում են բողոքների ընդունման և հետագա ընթացք տալու կարգը։ Որոշման նախագծի մշակման գործում ներգրավված են եղել ՀՀ էկոնոմիկայի նախարարությունը, Վերակառուցման և զարգացման եվրոպական բանկի գործարարության աջակցման գրասենյակը և Համաշխարհային բանկի խումբը։ Վերը նշված որոշումների ընդունմամբ կառավարությունն ակնկալում է տեսչական մարմինների բնականոն գործունեության ապահովմանն ուղղված իրավական հիմք ստեղծել։ Աստիճանաբար անցում կկատարվի ռիսկի վրա հիմնված ստուգման, որը և այս բարեփոխման հիմնական էությունն է։