Ո՞րն է առատ դաշտանի պատճառը

Յուրաքանչյուր կին կյանքում գոնե մեկ անգամ բախվել է առատ դաշտանին, որի ընթացքում ավելի քան 80 մլ արյուն է կորցնում: Մինչեւ վերջերս առատ դաշտանը կապում էին ինչպես անատոմիական առանձնահատկությունների, այնպես էլ որոշ պաթոլոգիական վիճակների հետ, սակայն իսկական պատճառն անհայտ էր:

Այժմ University of Edinburgh-ի գիտնականները գուցե հայտնաբերել են առատ դաշտանի պատճառը: Նրանց խոսքով, էնդոմետրիոզը կամ ֆիբրոման իրոք կարող են առատ արյունահոսություն առաջացնել դաշտանի դեպքում, բայց հաճախ այդ արյունահոսությունները կապված են HIF1 սպիտակուցի խտության փոփոխության հետ: Այդ սպիտակուցն այլ գեներ է ակտիվացնում թթվածնի մակարդակի անկման պայմաններում, որն արգանդում հաճախ ի հայտ է գալիս դաշտանի ընթացքում:  HIF1-ը մասնակցում է աղիքի եւ արգանդի ծածկույթի ամբողջականության վերականգնմանը: 

Հետազոտողները բջիջների նմուշներ են վերցրել 8 կնոջից, որոնցից չորսը տառապել են դաշտանային առատ արյունահոսություններով: Նրանք հայտնաբերել են, որ  դաշտանի սկզբից կարճ ժամանակ առաջ արգանդում սկսել է արտահայտվել  HIF1 սպիտակուցը, սակայն նրանց մոտ, ում արտադրություններն առատ էին, դրա խտությունն էականորեն ավելի ցածր է եղել:  

Գիտնականները Ջեքի Մեյբինի գլխավորությամբ փորձարկում են կատարել մկների վրա, որոնց մոտ հորմոնների ներարկման միջոցով մարդու դաշտանային շրջափուլ հիշեցնող շրջափուլ են խթանել:  Պարզվել է, որ HIF1 արտադրելու կարողությունից զրկված կենդանիների մոտ արգանդի ծածկույթի վերականգնում տեղի չի ունեցել ոչ 16, ոչ 24 ժամ անց, ինչպես առողջ կենդանիների մոտ է:

Դա մատնանշում է, որ այս սպիտակուցի արտադրությունն իրոք կարեւոր է արգանդի ծածկույթի վերականգնման եւ դաշտանի ընթացքում արյան մեծ կորուստները կանխելու գործում: Հնարավոր է, որ առատ արյունահոսության խնդրի լուծում կարող է դառնալ այդ սպիտակուցի խթանումը: