Ընտանեկան ջերմությունը, սիրո պահպանումը, խաղաղությունը փողով չես գնի. Յանա Դանիելյանը՝ ծննդյան օրվա մասին

Life.panorama.am-ը գրում է . 

Երեկ՝ հուլիսի 3-ին, դերասանուհի, հաղորդավարուհի Յանա Դանիելյանը նշել է ծննդյան 28-ամյակը, իսկ այսօր Life.panorama.am-ին պատմել է տոնական օրվա, ամենաթանկ շնորհավորանքների ու նպատակների մասին:

«Ծննդյանս օրն այս տարի համընկավ Վարդավառի հետ, ու ինչպես մեր ողջ հանրապետությունում, այնպես էլ մեր տանը բարձր տրամադրությունն էր իշխում: Ճիշտ է՝ կրկին Վարդավառի պատճառով մենք տանից դուրս չեկանք, բայց փոխարենը մեր հյուրերին ընդունեցինք տանն ու գեղեցիկ, մտերմիկ ընթրիք կազմակերպեցիքն, որին ներկա էին միայն մեր հարազատները»,- պատմեց Յանան ու շարունակեց.

«Իրականում՝ ծննդյանս օրվա մեկնարկը սկսեցինք կեսգիշերին, երբ ինձ շնորհավորելու կապակցությամբ մեր տուն էին եկել Սուրենի քույրն ու ամուսինը իրենց բալիկի հետ: Օրս շատ ուրախ ու ջերմ մթնոլորտում սկսեցի, ինչի համար շատ շնորհակալ եմ հարազատներիս»:

Հետաքրքրվելով, թե ինչպե՞ս են դերասանուհուն շնորհավորել ամուսինն ու դուստրը, Յանան պատմեց.

«Սուրենը ինձ շնորհավորեց կեսգիշերից էլ շուտ, որպեսզի առաջինը լինի, նվիրեց շատ գեղեցիկ ծաղիկներ ու իմ սիրելի օծանելիքը, դե իսկ աղջիկս միայն առավոտյան ավելի լավ հասկացավ, որ մայրիկի ծննդյան օրն է, նա ինձ նվիրեց իր ձեռքով պատրաստած շատ գեղեցիկ բացիկ, որն ինձ համար երեկվա ամենաարժեքավոր նվերը դարձավ»:

Յանա Դանիելյանի համար երեկ հնչած բոլոր շնորհավորանքներն էլ ամենաթանկն են համարվել.

«Նրանք, ովքեր երեկ ինձ շնորհավորեցին, բոլորն էլ ինձ համար թանկ մարդիկ են ու բոլորի շնորհավորանքներն էլ թանկ են ինձ համար: Եթե եղան մարդիկ, ովքեր չեն շնորհավորել, չեն հիշել կամ չեն իմացել, ուրեմն այդպես պետք է լիներ»,- նկատեց նա:

28-ամյա հաղորդավարուհին գոհ է ինքն իրենից, քանի որ իր իսկ խոսքով՝ շատերը 28-ում չեն հասցրել անել այնքան բան, որքանի ինքն է հասցել.

«Ապրածս 28 տարիներից շատ գոհ եմ: Թող ամպագորգոռ չթվա, բայց շատերը մինչ այս տարիք չեն կարողանում կայուն աշխատանք ու ընտանիք ունենալ, իսկ ես ունեմ դա: Ես ունեմ հիանալի ընտնիք՝ սիրելի ամուսին ու հրաշալի աղջիկ, իսկ դրանից առավել երջանկություն ու ձեռքբերում ինձ համար չկա»,- նշեց Յանան, իսկ երազանքների մասին խոսելիս՝ հավելեց.

«Գիտեք, իմ երազանքները ավելի շատ գլոբալ բնույթի են՝ ես երազում եմ խաղաղ երկրի, առողջության, երջանկության պահպանման մասին, իսկ այն, ինչ վերաբերվում է գործնականին, դրանք ինձ մոտ նպատակների են վերածված, որոնք քիչ-քիչ իրագործում եմ: Ես մի բան հաստատ գիտեմ՝ այն, ինչ կարելի է գնել փողով, դրանք մի օր հաստատ կլինեն, բայց ընտանեկան ջերմությունը, համերաշխությունը, սիրո պահպանումը, խաղաղությունը փողով չես գնի, դրա համար պետք է պարզապես ամեն ջանք ներդնել, որպեսզի ինքդ քո ներդաշնակության համար այդ կարեւոր հատկանիշները լինեն քո կյանքում»:

Life.panorama.am-ը եւս միանում է շնորհավորանքներին ու Յանա Դանիելյանին մաղթում նորանոր հաջողություններ:

Հեղինակ՝ Անուշիկ Մելքոնյան