Կնճիռներն առաջանում են ոչ միայն ծերանալուց, այլև շատ ժպտալուց. Կյանքի որերորդ տարեդարձն է նշում Զառա Արամյանը

Life.panorama.am-ը գրում է . 

Դերասանուհի, Հ2 հեռուստաընկերության «Համով զրույց» հաղորդաշարի հեղինակ և վարող Զառա Արամյանն այսօր նշում է ծննդյան 46-րդ ամյակը: Ժպտառատ դերասանուհին Life.panorama.am-ին պատմել է, որ կեսգիշերին ընտանիքի հետ միասին բարձր տրամադրությամբ մեկնարկ է տվել ծննդյան օրվա:

«Արդեն մի քանի տարի է, ինչ ծննդյանս օրը ուղիղ կեսգիշերին կատարվում է մի հրաշք, որի մասին չեմ խոսի, քանի որ  հրաշքը պետք է պահպանել հոգուդ ներսում: Երեկ էլ այդ անասելի պահից հետո իմ հրաշք բալիկները իրենց անակնկալը մատուցեցին ինձ՝ նվիրելով իրենց իսկ ձեռքով պատրաստած բացիկ, որի վրա իմ եղունգների լաքերով փոքրիկ սրտիկներ էին պատկերված, իսկ վրան գրված էր «Եթե դու բոլորի համար աստղ ես, ապա մեզ համար մեր մամուշն ես», սրա հետ միասին տղաս ու աղջիկս գումար էին խնայել ու ինձ նվիրեցին իրենց հավաքած 2800 դրամը. Հավատացեք՝ սա այսօրվա իմ ամենաթանկ նվերն էր՝ իմ ամենաթանկ մարդկանցից»,- պատմեց օրվա հերոսուհին:

Մեր հարցին, թե ամուսինն ինչպե՞ս է շնորհավորել Զառային, դերասանուհին նկատեց. «Գիտեք, իմ ու ամուսնուս միջև տարիքի հետ էլ ավելի է ուժգնանում սերը, կապվածությունը, միմյանց արժևորելու զգացողությունը, գիտակցումն ու զգացողությունը, որ նա իմ մի մասնիկն է, իմ կեսն է, իմ զավակների հայրն է, ուղղակի անպատմելի է: Այն, որ նա ինձ ուղիղ կեսգիշերին համբուրեց ու շնորհավորեց, իսկապես ամենաթանկն է: Ես երեկ էլ նրան ասացի, որ ուզում եմ ևս 92 տարի նա ինձ ծննդյանս օրն այսպես շնորհավորի»:

Զառա Արամյանը ծննդյան օրը կնշի, իր խոսքով, բացառապես թանկ ու հարազատ մարդկանց շրջապատում. «Երեկվանից այնքան շնորհավորանքներ եմ ստացել ու շարունակում եմ ստանալ, որ հաճույքով կցանկանայի բոլորին հրավիրել ծննդյանս օրը նշելու, սակայն այդ պարագայում խնջույքը պետք է կայանար մեր մարզադաշտերից մեկում,- նշեց Զառան ու շարունակեց,- բայց, քանի որ մարզադաշտում նշելու հնարավորություն չկա, ուստի այսօր տոնս կանցնի իմ կյանքի ամենաթանկ ու հարազատ մարդկանց շրջապատում»:

Ինչպես հայտնի է՝ վերջերս Զառա Արամյանը սրտի հետ կապված խնդիրներ ուներ, որի պատճառով  նրան սրտի ստենտավորում են կատարել: Հետաքրքրվելով դերասանուհու առողջական վիճակով՝ վերջինս նշեց.

«Ճիշտ է՝ դա բավականին լուրջ խնդիր էր, ու այժմ էլ շարունակում եմ բուժման կուրսեր ընդունել, բայց ինձ համար ամենակարևորը այդքան անսպասելի ուշադրությունն ու անհանգստությունն էր ուղղված ինձ: Այն, որ ամբողջ ազգս էր հետաքրքրված իմ առողջությամբ, ինձ մեծ ուժ տվեց: Այդքան մեծ սիրո մեջ ես հասկացա, որ եթե մատս էլ փուշ մտնի, իրան-իրան դուրս կգա, քանի որ ես ունեմ ամենակարևորը՝ սեր ու ջերմություն իմ անձին ուղղված: Յուրաքանչյուր տկարություն կնահանջի, երբ այդքան մեծ սեր լինի, դրա համար ես չվախեցա ոչնչից: Այսօր՝ ծննդյանս օրը, ինքս ինձ մաղթում եմ, որ պահպանեմ այս սերը: Այսօր ինքս իմ կյանքը վերլուծելով՝ Փառք Աստծո, կարող եմ ասել, որ գոհ եմ ապրածս կյանքից: Սխալվել կարելի է, գլխավորը սխալն ընդունելն ու առաջ շարժվելն է, կարևորը բարություն սփռելն է, որովհետև ամեն բան բումերանգի օրենքով հետ է վերադառնում քեզ»:

Ի դեպ՝ Զառա Արամյանին արդեն նշմարվող կնճիռներն ու տարիների գումարը ոչ մի կերպ չեն վախեցնում և նույնիսկ ընդհակառակը. «Ես բացարձակ չեմ վախենում մեծանալուց, ընդհակառակը՝ ես հպարտանում եմ իմ տարիքով, քանի որ դա մեր ապրածի արտացոլանքն է: Ամեն օր, երբ  աչքերս բացում եմ ու Տերունական աղոթքն ասում, շնորհակալություն եմ հայտնում Աստծուն, որ կամ, զգացմունքներ ունեմ ու ապրում եմ: Ես հպարտանում եմ արդեն երևացող իմ կնճիռներով, որովհետև դրանցից ամեն մեկը մի պատմություն ունի, ի վերջո՝ կնճիռնեը առաջանում են ոչ միայն ծերանալուց, այլև շատ ժպտալուց»,- ավարտեց դերասանուհին:

Life.panorama.am-ը ևս միանում է շնորհավորանքներին՝ Զառա Արամյանին մաղթելով  ամուր առողջություն և նորանոր ձեռքբերումներ:

Հեղինակ՝ Անուշիկ Մելքոնյան