Թուրքիայի խորհրդարանը մերժել է Ստամբուլի ահաբեկչությունը հետազոտելու ընդդիմության առաջարկը

 Թուրքիայի խորհրդարանում մեծամասնություն կազմող իշխող «Արդարություն եւ զրգացում» կուսակցության (ԱԶԿ) պատգամավորների միաձայն քվեարկությամբ մերժվել է հունիսի 28-ի գիշերը Ստամբուլի Աթաթուրքի անվան միջազգային օդանավակայանում իրագործված ահաբեկչական պայթյունները հետազոտելու վերաբերյալ հանձնաժողով ստեղծելու մասին ընդդիմադիր Ժողովրդահանրապետական (ԺՀԿ), քրդական Ժողովուրդների դեմոկրատական (ԺԴԿ) եւ Ազգայնական շարժում կուսակցությունների կողմից արված առանձին առաջարկությունները:

Այս մասին, ինչպես հաղորդում է «Արմենպրես»-ը, հայտնում է թուրքական «Ջումհուրիեթ» թերթը` նշելով, որ առաջարկը խորհրդարանի կողմից մերժվելու մասին Twitter-ի իր էջում գրառել է ԺՀԿ Ստամբուլից ընտրված պատգամավոր Էրեն Էրդեմը: 

Ընդդիմադիր պատգամավորը չի նշել իրենց առաջարկը ԱԶԿ-ի կողմից մերժվելու պատճառը:

Թուրքական պաշտոնական շրջանակները հայտնել են, որ  օդանավակայանում ահաբեկչական հարձակման հետեւանքով 41 մարդ սպանվել, 239-ն էլ վիրավորվել են:

Թուրքիայի ներքին գործերի նախարար Էֆքան Ալան հայտարարել է, որ իրենց մոտ եղած բոլոր տեղեկությունները մատնանշում են, որ ահաբեկչական գործողությունն իրագործել են «Իսլամական պետություն» (ԻՊ) ահաբեկչական խմբավորման մարտիկները:

Թուրքական եւ միջազգային ԶԼՄ-ներն ավելի վաղ հայտնել են ԻՊ-ի հետ Թուրքիայի ազգային անվտանգության ծառայության գաղտնի կապերի, Թուրքիայի կողմից ԻՊ-ին զենք-զինամթերք մատակարարվելու եւ թիկունքային աջակցություն ցուցաբերվելու մասին: