Աննա Բաբայանը կիսվում է գեղեցիկ կազմվածքի, մաշկի և վարսերի խնամքի իր տարբերակներով

Life.panorama.am-ը գրում է . 

Մոդել, դիմահարդար Աննա Բաբայանը Life.panorama.am-ի հետ զրույցում կիսվել է իր գեղեցկության բանաձեւով:

Մեզ հետ զրույցում գեղեցիկ մարմին ունենալու համար Աննան առաջին հերթին առանձնացրեց առողջ սննդի գործոնը.

«Ինձ համար ամենակարեւորը առողջ սնունդն է, ես փորձում եմ մշտապես ճիշտ սնվել ու օրական 1.5-2 լիտր ջուր խմել, քանի որ մեր օրգանիզմում ջրի գործոնը շատ մեծ է»,- նշեց մոդելը, ով բոլորովին վերջերս է մայրացել:

Բալիկին ունենալուց հետո քաշի վերականգնման եւ առհասարակ կազմվածքը պահպանելու թեմայի շուրջ Աննան ժպիտով նկատեց.

«Սպորտով չեմ զբաղվում, փոխարենը բավականին շատ եմ քայլում: Ծննդաբերությունից հետո դեռ լիովին նախկին քաշս չեմ վերականգնել, բայց արդեն շատ մոտ եմ: Բալիկին ունենալուց հետո դիետաներ չեմ պահում, ուղղակի փոքրիկի խնամքով ինքնուրույն զբաղվելն արդեն իսկ օգնում է ազատվել ավելորդ կիլոգրամներից»:

Աննա Բաբայանը դեմքի մաշկին թարմ տեսք հաղորդելու համար պարբերաբար օգտագործում է խոնավեցնող քսուկներ.

«Որպես դիմահարդար՝ ճիշտ եմ համարում դեմքը հաճախ խոնավեցնել համապատասխան քսուկներով, որոնց մեջ մեծ քանակությամբ կոլլագեն է պարունակում, քանի որ մեր մաշկը թոշնում է հիմնականում հենց կոլլագենի բացակայության պատճառով»,- ընդգծեց նա:

Անդրադառնալով վարսերի ամրությանն ու խնամքին՝ իր փարթամ վարսերով աչքի ընկնող մոդելը հավելեց.

«Հղիության ընթացքում մազերս շատ փարթամացան, բայց գիտեի, որ դա հորմոնների արդյունք է եւ ամիսներ անց մազաթափություն եմ ունենալու: Ճիշտ է՝ այս պահին դեռեւս ամեն բան նորմալ է, բայց հատուկ վարսերի համար նախատեսված վիտամիններ եմ ընդունում: Իմ դեպքում մազերի խնամքի լավագույն միջոցը քիչ հարդարելն է, քանի որ տաք արդուկն ու վարսահարդարիչը կարող են խիստ վնասել մազերը»:

Հեղինակ՝ Անուշիկ Մելքոնյան