Ես այդպես էլ չեմ հասկանա մարդկանց, ովքեր պնդում են, թե ծննդաբերությանը մասնակցելը բարդ է. Գոռ Պետրոսյանը ներկա է եղել դստեր ծնունդին

Life.panorama.am-ը գրում է . 

Գոռ Պետրոսյանի եւ Մերի Ներսիսյանի երկրորդ դուստրը ընդամենը օրեր առաջ է լույս աշխարհ եկել: Փոքրիկն ու մայրիկն այսօր արդենը տանը կլինեն, իսկ մինչ այդLife.panorama.am-ը զրուցել է երջանիկ հայրիկի հետ, ով ի դեպ՝ ներկա է գտնվել ծննդաբերությանը:

«Ես այդպես էլ չեմ հասկանա մարդկանց, ովքեր պնդում են, թե ծննդաբերությանը մասնակցելը բարդ է: Այո, հուզվում ես, այո, գուցե մի փոքր էլ վախենում, բայց ես թե Էվայի ժամանակ, թե այսօր պնդում եմ, որ յուրաքանչյուր տղամարդ պետք է ներկա լինի իր երեխաների լույս աշխարհ գալուն: Կինդ անցնում է մի շարք փորձությունների միջով և եթե այդ պահին դու նրա կողքին չես, ապա էլ ե՞րբ ու ինչպիսի՞ իրավիճակում նա պետք է զգա, որ ամուր հենարան ունի, ում հետ կարող է դժվարություններ հաղթահարել: Վստահ եմ՝ այն տղամարդն, ով ներկա է լինում իր երեխայի լույս աշխարհ գալուն, բոլորովին այլ կերպ է ընկալում նոր կյանքի ծնունդը, այլ կերպ է վերաբերվում մոր ու երեխայի խնամքին և վերջապես կարողանում է ըստ արժանվույն գնահատել այն գինը, որը կինը վճարում է ազգանունդ շարունակելու, քեզ սերունդ տալու համար: Բացի այդ՝ ես չեմ պատկերացնում, որ երեխաս կարող է ծնվել, իսկ ես միայն ժամեր անց նրան տեսնելու հնարավորություն կունենամ. ես այդքան համբերատար չեմ»,- կնոջ ծննդաբերությանը ներկա գտնվելու թեմաի շուրջ՝ նշեց Գոռն ու պատմեց դստեր հետ առաջին հանդիպման մասին.

«Առաջին հանդիպումն անմիջապես նրա լույս աշխարհ գալուց էր. տպավորություններն աննկարագրելի են: 3 ու կես կիլոգրամանոց մի հրաշք մեկ վայրկյանում նոր գույն, նոր համ ու հոտ է տալիս կյանքիդ: Բայց ես պետք է խոստովանեմ, որ մինչև այս պահը կարծես հարյուր տոկոսով չեմ գիտակցել մեզ պատահած երջանկությունը: Այսօր էլ գրկել էի աղջկաս, նայում էի նրա քնած դեմքին ու ինքս ինձ հարցնում՝ միթե սա իմ երեխան է»:

Գոռն ու Մերին դստերը Սառա անունն են անվանել: Անվան ընտրությունը երջանիկ ընտանիքում իր նախապատմությունն ունի.

«Սառա անունը հնչել էր մեր քննարկումների ժամանակ դեռևս առաջնեկի ծնունդից առաջ, բայց այն ժամանակ «հաղթեց» Էվա անունը: Երբ իմացանք, որ մեր երկրորդ երեխան էլ է աղջիկ լինելու, շատ արագ հիշեցինք Սառայի մասին: Այդ անունն այնքան դուր եկավ ավագ դստերս, որ անմիջապես սկսեց քրոջն այդպես կոչել: Կարճ ժամանակ անց էլ կասկած չկար, որ մեր երկրորդ աղջիկը հենց այդ անունն է կրելու: Ինչ վերաբերում է նշանակությանը, մեր առաջնեկին կնքեցինք Աստվածաշնչյան անունով, Էվա նշանակում է շնչառություն, կյանք, ուստի երկրորդի անունն էլ պետք է խորիմաստ լիներ. Սառա-ն նույնպես Աստվածաշնչյան անուն է, նշանակում է արքայադուստր, տիրուհի»,- պատմեց նորաթուխ հայրիկը:

Գոռի ու Մերիի ավագ դուստրը եւս անհամբեր սպասել է քույրիկի ծնունդին, այժմ էլ նույն անհամբերության մայրիկի ու քույրիկի տուն գալուն է սպասում.

«Էվան շատ էմոցիոնալ երեխա է. ուրախ է, թե տխուր՝ երևում է միանգամից: Նա շատ երկար էր սպասել քույր կամ եղբայր ունենալուն. նրանց տարիքային տարբերությունը 7 տարի է կազմում: Չենք բացառում, որ խանդի տեսարաններ կլինեն, որ երբեմն-երբեմն դժվար կլինի, բայց առայժմ, այս պահին նա ֆանտաստիկ երջանիկ է: Անդադար քրոջ մասին է խոսում, հիանում նրա նկարներով: Իր կյանքն էլ կարծես սկսել է պտտվել նորեկի շուրջ: Հուսով եմ՝ մենք կկարողանանք այնպես անել, որ ժամանակի հետ նրանց սերն ու մտերմությունը միայն ամրանան»,- նշեց Գոռ Պետրոսյանը:

Այսօր Մերին ու նորածին Սառան տանը կլինեն, հետաքրքրվելով, թե հայրիկը ի՞նչ անակնկալ է պատրաստել նրանց համար, Գոռը նկատեց.

«Մի թեթև անակնկալ նախապատրաստել ենք Մերիի եղբոր կնոջ՝ Անիի հետ, բայց շատ չենք ծանրացրել՝ հաշվի առնելով, որ նրանց տուն դառնալուն պես մեծ խնջույք չենք սարքելու: Ինձ համար հիմա շատ ավելի կարևոր է, որ Մերին հանգիստ միջավայրում լինի, մարմինն ու միտքը մի փոքր հանգստանան, իսկ մեծ ու գունեղ տոնակատարություն դեռ կհասցնենք կազմակերպել, օրինակ՝ Սառայի 40 օրականին, այդ օրն, ի դեպ, նախատեսում ենք նաև մկրտել նրան»:

Հեղինակ՝ Անուշիկ Մելքոնյան