Սիրիայի նախագահն իր անմոռուկով նկարը կուղարկի Էրդողանին

Օրեր առաջ Սիրիայի Արաբական Հանրապետությունում տեղի է ունեցել Հայաստան-Սիրիա խորհրդարանական հանդիպումը: Հանդիպումը եղել է երկրի նախագահ Ասադի, խորհդարանի նախագահի, վարչապետի եւ արտգործնախարարի, ինչպես նաեւ հոգեւոր առաջնորդի հետ:

ԱԺ ՀՀԿ խմբակցության պատգամավոր Տաճատ Վարդապետյանը, Orer.am-ի հետ զրույցում անդրադառնալով հանդիպմանը, նշեց, որ այն անց է կացվել ամենաբարձր մակարդակով, որի ընթացքում քննարկվել են երկու ժողովուրդների շահերին առնչվող մի շարք կարեւոր հարցեր:

«Մեր պատվիրակությունն ամենաբարձր մակարդակով հանդիպումներ ունեցավ Սիրիայի բարձրագույն իշխանությունների հետ: Նշեմ, որ նախագահ Ասադի հետ հանդիպումը տեւեց գրեթե մեկ ժամ` փոխադարձ ջերմության եւ Հայաստանի հանդեպ բացահայտ հարգանքի եւ ակնածանքի մթնոլորտում»:

Պատգամավորը հայտնեց, որ հանդիպման ժամանակ հայկական պատվիրակությունը շնորհակալություն է հայտնել Սիրիայի նախագահին՝ Հայոց ցեղասպանության 100-րդ տարելիցի միջոցառումներին ակտիվ ներգրավվածություն ցուցաբերելու համար: 
Խոսելով ապրիլի 24-ի եւ Հայոց ցեղասպանության 100-րդ տարելիցի մասին՝ պարոն Վարդապետյանը հայտնեց.

«Սիրիայի խորհրդարանում արդեն երեք հանձնաժողովներ քննարկել եւ դատապարտել են Հայոց ցեղասպանությունը: Պետք է հայտնեմ, որ այդ գործընթացը շարունակական ընթացք ունի: Կարծում եմ՝ մոտ ապագայում Սիրիան եւս կհամալրի այն պատվարժան պետությունների շարքը, որոնք ճանաչել եւ դատապարտել են Հայոց ցեղասպանությունը»:

ՀՀԿ-ական պատգամավորը նաև պատմեց մի փոքրիկ, բայց կարեւոր դրվագ հանդիպումից.

«Երբ նախագահ Ասադի հետ հանդիպման էինք, ես դիմեցի նրան ու ցույց տվեցի բոլորիս կրծքին ամրացված անմոռուկը՝ բացատրելով դրա խորհուրդը, որից հետո ես նրան նվիրեցի անմոռուկ: Նա անմիջապես այն ամրացրեց իր կոստյումին եւ ասաց, որ մենք բոլորս՝ անմոռուկները մեր կրծքին, պետք է նկարվենք, եւ այդ նկարն ուղարկենք Էրդողանին. դա անկեղծության անմիջական դրսեւորում էր»:

Սոսե Չանդոյան

Աղբյուրը՝ Orer.am