Վերին Լարսը փակ կմնա եւս 10 օր

Հորդառատ անձրեւներից առաջացած սողանքավտանգ իրավիճակի եւ Թերեք գետի վարարման պատճառով հունիսի 23-ից  փակվել է Ստեփանծմինդա-Լարս ավտոճանապարհը, որը փակ կմնա եւս 10 օր:

ՀՀ տրանսպորտի և կապի նախարարությունի տարածած հաղորդագրության մեջ նաեւ նշվում է.

«Վրաստանի ենթակառուցվածքների նախարարության ճանապարհային դեպարտամենտից  ՀՀ տրանսպորտի եւ կապի նախարարությանը տեղեկացրել են, որ ստեղծվել է օպերատիվ խումբ, որը տեղում ուսումնասիրելով   իրավիճակը   հայտնել է, որ  ճանապարհի վերականգնողական աշխատանքները կտեւեն ավելի քան 10-ը օր:

Նշենք, որ ՀՀ տրանսպորտի եւ կապի նախարարությունը մշտապես կապի մեջ է բոլոր փոխադրող ընկերությունների հետ, նախարարության կողմից նրանց առաջարկվել է օգնություն, օժանդակություն, նաեւ՝ փոխադրումը լաստանավերով շարունակելու  Փոթիի եւ Բաթումիի նավահանգիստներից։

Մեր ունեցած տեղեկություններով՝ երեկվա դրությամբ Բաթումիից դեպի Նովոռոսիյսկ է  ուղեւորվել 100 ավտոմեքենա տարողությամբ լաստանավ, որի վրա շուրջ 55 մեքենա հայկական համարներով է եղել:

Փոթիի նավահանգստից պատրաստվում է շարժվել եւս մեկ լաստանավ՝ 50 ավտոմեքենա տարողությամբ:

Փչացող բեռներով բոլոր ավտոմեքենաները Լարսից  արդեն շարժվել են դեպի Բաթումիի եւ  Փոթիի նավահանգիստներ։

Այն փոխադրողները, ովքեր  հրաժարվել են  լաստանավով շարունակելու ճանապարհը, Վրաստանի ճանապարհային դեպարտամենտի եւ ոստիկանության աշխատակիցները  ուղեկցել են դեպի անվտանգ կայանատեղիներ:

Ներկայում ինտենսիվ աշխատանքներ են ընթանում ճանապարհն օր առաջ բացելու ուղղությամբ։ Վրաց ճանապարհաշինարարներին հաջողվել է գետի հունը մի փոքր փոխել, ինչը հուսադրող է, եւ հնարավոր է, որ այսօրվա ընթացքում արդեն սկսվեն ճանապարհի վերականգնման աշխատանքները»: