«The Beautified Project»-ի կիթառահար Արմեն Շավերդյանի և Միլենա Ոսկանյանի պսակադրությունը կկյանա հուլիսի 7-ին

Life.panorama.am-ը գրում է . 

«The Beautified Project» ռոք-խմբի կիթառահար Արմեն Շավերդյանի եւ պարուհի Միլենա Ոսկանյանի հարսանիքը տեղի կունենա հուլիսի 7-ին, իսկ մինչ այդ Life.panorama.am-ին Արմենը պատմել է սպասվող հարսանեկան արարողությունից եւ տրամադրել վերջերս կայացած զագսավորման լուսանկարները:

«Իմ ու Միլենայի համար հուլիսի 7-ն այլեւս սովորական օր լինել չի կարող, քանի որ այդ օրը կկայանա մեր պսակադրությունը: Որքան էլ ես ու Միլենան գերզբաղված ենք աշխատանքով, բայց կարողանում ենք ժամանակ հատկացնել նաեւ հարսանիքի կազմակերպչական աշխատանքներին: Այդ օրը շոուառատ հարսանիք է սպասվում՝ երաժշտությունով ու պարով լի, առանց որի ես ու սիրելիս չենք պատկերացնում մեր հարսանիքը»,- պատմեց Արմեն Շավերդյանը:

Թեպետ զույգը շատ է սիրում հայկական մշակույթը, բայց Արմենի խոսքով իրենց հարսանիքը միայն կիսով չափ է հայկական ավանդույթներով լինելու: Կիթառահարը վստահեցրեց՝ այդ օրը անակնկալներ շատ են լինելու:

Արմենի եւ Միլենայի պսակադրության կնքահայրը  իրենց մտերիմ ընկերն է.

«Ընտանիքում կնքահոր դերը շատ եմ կարեւորում: Մեր պսակադրության կնքահայրը լինելու է իմ շատ լավ ընկեր Սթեվեն Դոնաթելլեն, ով լինելով ամերիկացի, տարիներ առաջ ամուսնացել է ու ապրում է Հայաստանում: Սթեվենի հետ շատ ընդհանուր հետաքրքրություններ ունեմ, մեզ  տարիներն արդեն ուժեղ կապել են»,- պատմեց երաժիշտը:

Ի դեպ՝ հետաքրքրվելով, թե ինչո՞ւ է զույգը Քաղաքացիական ամուսնության գրասենյակում ավելի շուտ կնքել ամուսնությունը,  Արմենը նշեց.

«Անկեղծ ասած՝ մենք պատրաստվում ենք նաեւ մեր ամուսնական ճամփորդությանը, ինչի համար դեսպանատանը որոշ փաստաթղթեր էին հարկավոր, այդ թվում եւ փաստաթուղթ, ըստ որի մենք արդեն ամուսիններ ենք: Ահա այդ պատճառով մենք հարսանիքից ավելի շուտ օրինականացրինք մեր ամուսնությունը»:

Իսկ մեղրամսի համար զույգը ընտրել է Հունաստանը.

«Հարսանիքից հետո մենք կգնանք Հունաստանի Ռոդոս կղզի, քանի որ երկուսս էլ ծով շատ ենք սիրում: Բայց ես պարզապես երազում եմ Միլենիս հետ Ռիո դե Ժանեյրոյում լինեմ. Կարծում եմ՝ դա կլինի ոչ հեռու ապագայում»,- մեղրամսի մասին խոսելիս՝ պատմեց Արմեն Շավերդյանը:

Մեզ հետ զրույցում Արմենը շեշտեց նաեւ, որ Միլենային տեսնելու առաջին իսկ օրից վստահ է եղել, որ նա իր կինն է լինելու.

«Զագսից հետո առանձնահատուկ ոչինչ չի փոխվել մեր կյանքում: Միլենային տեսնելու առաջին իսկ օրից գիտեի, որ նա իմ կինն է լինելու, ուղղակի ուզում եմ ինչքան հնարավոր է շուտ միասին ապրենք ու ստեղծենք մեր ընտանիքը»,- հավելեց երաժիշտը:

Իսկ վերջում աշխատանքների մասին խոսելիս՝ կիթառահարը պատմեց.

«Այժմ զբաղված եմ իմ սոլո ալբոմի ձայնագրություններով, որը հավանաբար հաջորդ տարի կհանձնեմ իմ հանդիսատեսի դատին: 4 ամիս առաջ թողարկածս սինգլը՝ «Sudden»-ը, 2015-ի դեկտեմբերին  «Radio vani awardin»-ին ճանաչվեց լավագույն երգ: Իսկ «The Beautified Project»-ի հետ զբաղված ենք մեր 4-րդ ձայնասկավառակով, ինչպես նաեւ պատրաստվում ենք շրջագայությունների: Այս ամենին զուգահեռ՝ շուտով կնկարահանեմ նաեւ նոր տեսահոլովակ»,- ավարտեց մեր զրուցակիցը:

Հեղինակ՝ Անուշիկ Մելքոնյան