Հռոմի պապի ինքնաթիռն ուղևորվում է Հայաստան. առցանց հնարավոր է հետևել դրա ընթացքին

Հռոմի Ֆրանցիսկոս պապն արդեն Հայաստանի ճանապարհին է: Հռոմի Սրբազան Քահանայապետի ինքնաթիռն արդեն օդ է բարձրացել և առցանց հնարավոր է հետևել պապի օդանավի ընթացքին:

Ֆրանցիսկոս պապի ինքնաթիռը Երևանի «Զվարթնոց» օդանավակայան կժամանի 15:00-ին:  

Օդանավակայանում պաշտոնական դիմավորման արարողությունից հետո Սրբազան Քահանայապետը կմեկնի Մայր Աթոռ Ս. Էջմիածին. Մայր Տաճարում տեղի կունենա Բարիգալստյան` «Հրաշափառի» արարողությունը: Նույն օրը երեկոյան Սրբազան Քահանայապետը Հայաստանի Հանրապետության Նախագահի նստավայրում հանդիպում կունենա Նախագահ Սերժ Սարգսյանի, ապա՝ ՀՀ իշխանությունների, հասարակության և դիվանագիտական կորպուսի ներկայացուցիչների հետ: Այցի առաջին օրը կամփոփվի Մայր Աթոռ Ս. Էջմիածնում կ այանալիք Ֆրանցիսկոս Պապի և Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հանդիպմամբ:

Կարևորելով Հռոմի Սրբազան Քահանայապետ Ֆրանցիսկոս պապի այցը Հայաստան, գիտակցելով 1 միլիարդի հասնող կաթոլիկ աշխարհի հոգևոր առաջնորդի գալստյան նշանակությունը՝ PanArmenian Media Group-ը Սրբազան Քահանայապետի եռօրյա այցը կլուսաբանի ուղիղ եթերում:

Հունիսի 24-ին, 25-ին և 26-ին «Արմենիա» TV-ի, ATV-ի և ArmNews-ի ուղիղ եթերում կներկայացվեն Հռոմի պապի հագեցած այցի մանրամասները. ուղիղ միացումներ կլինեն Երևանից, Էջմիածնից, Գյումրիից:

Հեռուստադիտողին հնարավորություն կտրվի տնից հետևել կատարվող իրադարձություններին՝ «Զվարթնոց» օդանավակայանում դիմավորման արարողությանը, Հայաստանի բարձրաստիճան պաշտոնյաների, հոգևորականների հետ հանդիպումներին, Սուրբ պատարագին, այցելությանը Հայոց ցեղասպանության հուշահամալիր և Սրբազան Քահանայապետի մասնակցությամբ մնացած բոլոր իրադարձություններին։

Հռոմի պապի այցի մասին օպերատիվ տեղեկատվություն կարող եք ստանալ նաև Tert.am լրատվական կայքում՝ երեք լեզուներով՝ անգլերեն, ռուսերեն, հայերեն, ինչպես նաև՝ կարող եք ուղիղ հետևել բոլոր հեռարձակումները։