Երեւանում Հայրենական մեծ պատերազմի հոբելյանի առնչությամբ կհնչի 70 համազարկ

Հայրենական մեծ պատերազմում տարած 70-ամյակի առնչությամբ մայիսի 9-ին Երեւանում եւ հանրապետության այլ քաղաքներում կկազմակերպվեն բազմաթիվ միջոցառումներ:

Ինչպես փոխանցեցին ՀՀ ՊՆ տեղեկատվության եւ հասարակայնության հետ կապերի վարչությունից, միջոցառումների մեկնարկը կտրվի մայիսի 9-ին «Հաղթանակ» զբոսայգում:

Ժամը 10:00-ին ՀՀ ԱԺ, կառավարության, Կառավարական հանձնաժողովի ներկայացուցիչները, ՊՆ, ԶՈՒ և ԶՈՒ ԳՇ ղեկավար կազմի, Հայաստանում տեղակայված ՌԴ ԶՈՒ զորախմբի հրամանատարության, ՀՀ-ում հավատարմագրված արտասահմանյան երկրների դիվանագիտական ու միջազգային կազմակերպությունների ներկայացուցիչները, Հայրենական մեծ պատերազմի վետերանները, հասարակական-քաղաքական կազմակերպությունների ներկայացուցիչները, մշակույթի ու գիտության գործիչները կայցելեն Երևանի «Հաղթանակ» զբոսայգի և հարգանքի տուրք կմատուցեն Անհայտ զինվորի հուշակոթողին: Այնուհետեւ, ՀՀ ԶՈ Ւ, ՌԴ սահմանապահ և 102-րդ բազայի միացյալ ստորաբաժանումները զինվորական շքերթ կանցկացնեն «Անհայտ զինվորի» հուշակոթողի մոտ:

Ժամը 11:00-12:00-ը կառավարական հանձնաժողովի անդամները, տոնակատարության մասնակիցները, պատերազմի վետերանները «Մայր Հայաստան» զինվորական թանգարանում կդիտեն Մեծ հաղթանակին նվիրված նորացված ցուցադրությունը: Ժամը 12:00-ին Կառավարական հանձնաժողովի անդամներն ու ՀՀ ԶՈւ բարձրաստիճան սպաները կմասնակցեն Հայրենական Մեծ պատերազմի վետերանների պատվին զինվորական տոնական հյուրասիրությանը ՌԴ 102-րդ բազայի և ՀՀ ԶՈՒ կողմից կազմակերպված զինվորական վրաններում: Հյուրասիրությանը կհաջորդի տոնական համերգը:

Երեւանում միջոցառումները կեզրափակվեն երեկոյան ժամը 22:00-ին տոնական հրավառությամբ, որի ժամանակ կհնչի 70 համազարկ:

Գյումրիում միջոցառումների մեկնարկը կտրվի առավոտյան ժամը 10:00-ին: ՀՀ զինված ուժերի և ՌԴ ԶՈՒ 102-րդ բազայի համահավաք վաշտերը զինվորական շքերթ կանցկացնեն Գյումրիի «Մայր Հայաստան» հուշահամալիրում:

Ողջ օրվա ընթացքում ՀՀ բոլոր մարզկենտրոններում տոնական միջոցառումներ կկազմակերպվեն Հայրենական մեծ պատերազմի, Արցախյան պատերազմի վետերանների, ՀԿ-ների, ուսանողների, աշակերտների, զինծառայողների, երիտասարդական կառույցների մասնակցությամբ: