Ղազախստանը դարձել է կրոնական գործիչների երկխոսության հարթակ. Տ. Մարկոս եպիսկոպոս Հովհաննիսյան

Ղազախստանը դարձել է կրոնական գործիչների  երկխոսության հարթակ: Այս մասին «Արմենպրես»-ի մամուլի սրահում հրավիրված ասուլիսին նշեց Ուկրաինայի հայոց թեմի առաջնորդ Տ. Մարկոս եպիսկոպոս Հովհաննիսյանն` անդրադառնալով Ղազախստանի նախաձեռնությամբ անցկացվող կրոնական առաջնորդների գագաթնաժողովին:

Ղազախստանը հսկայական աշխատանք է տանում` դիտարկվելու  որպես կրոնական գործիչների  երկխոսության հարթակ: Դա մեզ հնարավորություն է տալիս ոչ միայն շփվել,  ճանաչել միմյանց, այլև իմանալ այն դժվարությունների ու խնդիրների մասին, որոնք առկա են: Քննարկվում են այն հարցերը, որոնք անհանգստացնում են ոչ միայն կրոնական գործիչներին, այլև` աշխարհին: Այդ տեսանկյունից  Ղազախստանը դարձել է երկխոսության հարթակ: Մենք հասկանում ենք, որ բոլոր խնդիրները մի քանի հանդիպումներում չեն քննարկվի, առավել ևս չեն լուծվի, բայց մտահոգիչ հարցերը բարձրաձայնվում են, և ամենակարևորը կա կամք դատապարտելու այն, ինչն աշխարհի համար ապակառուցողական է, մարդկության համար` վտանգավոր»,-ասաց Տ. Մարկոս եպիսկոպոս Հովհաննիսյանը: Նա նշեց, որ անցկացվել է համաժողով, որի ընթացքում մասնակիցները միաձայն ընդգծեցին այն, որ կրոնը կապ չունի միջազգային ահաբեկչության հետ:

Հայաստանում Ղազախստանի Հանրապետության նորանշանակ արտակարգ և լիազոր դեսպան Թիմուր Ուրազաևը նշեց, որ Ղազախստանի նախաձեռնությունը պատահական չէ: Ղազախստանում ապրում են ավելի քան 130 էթնիկ խմբերի, տարբեր դավանանքի ներկայացուցիչներ, հետևաբար պետությունը հանդես է գալիս հանդուրժողականության, անվտանգ, կայուն պետություն ունենալու տեսանկյունից:

«Ժամանակակից միջազգային իրադարձությունները դառնում են շատ լուրջ գործոն անվտանգության տեսանկյունից: Տեսնում ենք, թե ինչպես է աճում լարվածությունը, ավելանում է կոնֆլիկիտների թիվը, առաջ է քաշվում կրոնի հարցը` կապելով այն անվտանգության հետ: Այդ համատեքստում կարևոր դերակատարություն ունի կրոնական առաջնորդների գագաթնաժողովը, որը երկխոսության լուրջ հարթակ է:  Այն տարիների ընթացքում ընդլայնվում է, եթե առաջին գագաթնաժողովի ժամանակ մասնակցում  էր 17 կազմակերպություն, ապա վերջինի ժամանակ արդեն ներկա էր 80 պատվիրակություն աշխարհի 42 եր կրից: Մենք կարևորում ենք այն, որ Հայ առաքելական եկեղեցին մշտապես մասնակցում է»,-ասաց դեսպանը:

Դեսպանը նշեց, որ Ղազախստանը կողմնակից է այն մոտեցմանը, որ պետություները ջանքեր գործադրեն, աշխատեն քաղաքացիական հասարակության, կրոնական կազմակերպությունների հետ: