Ավագ ենթասպան մեղադրվում է զորամասից 17 մլն դրամի ապրանք դուրս բերելու եւ յուրացնելու մեջ

News.am-ը գրում է .

ՊՆ զորամասի ապրանք ռազմատեխնիկական գույքի պահեստի պետ Արտաշես Այվազյանը մեղադրվում է խոշոր չափի հափշտակություն կատարելու մեջ: Այս մասին NEWS.am-ը տեղեկացավ Դատական տեղեկատվական համակարգից:

Ըստ մեղադրական եզրակացության` ավագ ենթասպա Այվազյանը, պատասխանատու լինելով պահեստում նյութական միջոցների առկայության և ժամանակին հաշվառման համար, պարտավոր լինելով հետևել այդ միջոցների առկայությանը, բացառել դրանց պակասորդները, վարել պահեստում գտնվող նյութական միջոցների քանակական հաշվառում,այսինքն, հանդիսանալով վարչատնտեսական լիազորություններով օժտված պաշտոնատար անձ, պաշտոնական դիրքն օգտագործելով, պարբերաբար պահեստից դուրս է բերել իրեն հանձնված, պահեստում պահվող և ՀՀ ԶՈՒ մարտական պատրաստության վարչությանը պատկանող առանձնապես խոշոր չափերով՝ 17 մլն 550 հազար դրամին համարժեք տարբեր տեսակի մալուխներ, թիրախներ, ամբարձիչներ, մետաղական խողովակներ, յուղաներկեր, մետաղական ճոպաններ և յուրացրել:

Բացի այդ վերադաս հրամանատարության մոտ իր ծառայողական պարտականությունները անթերի, ճիշտ և ժամանակին զինծառայողի պատրանք ստեղծելու նպատակով, յուրաքանչյուր ամիս պահեստներում պահվող ապրանքանյութական արժեքների վերաբերյալ կազմել է ակնհայտ կեղծ տեղեկանք:

Արտաշես Այվազյանին մեղադրանք է առաջադրվել Քրեական օրենսգրքի 179-րդ հոդվածի 3-րդ մասի 1-ին կետով: Նա գրավի դիմաց ազատ է արձակվել:

Գործը քննվում է Ավան եւ Նոր Նորք վարչական շրջանների ընդհանուր իրավասության դատարանում: