Ռուս զբոսաշրջիկների փոխարեն Թուրքիայում պետծառայողներին հարկադիր արձակուրդ կուղարկեն

Թուրքիայում ստեղծված տնտեսական խնդիրները հաղթահարելու նպատակով 1 մլն թուրքական պետծառայողներ հարկադիր արձակուրդ կուղարկվեն: Պետական կառույցների աշխատակիցներին ուղարկում են պարապ եւ դատարկ հանգստյան տներ, իսկ ուղեգրի արժեքը կհանեն նրանց աշխատավարձից:

Ինչպես հաղորդում է «Արմենպրես»-ը` վկայակոչելով թուրքական «Օզգյուր դուշունջե» թերթը, տվյալ նախագիծն ուղղված է այն բանին, որպեսզի կարգավորել Ռուսաստանի հետ հարաբերությունները վատանալու եւ երկրում ահաբեկչության գործողությունների պատճառով զբոսաշրջության մեջ ծագած ճգնաժամը

Թուրքիայի 1 մլն պետծառայողներ կուղարկվեն միջերկրականի առափնյա հյուրանոցներ եւ հանգստյան տներ. պետությունն ուղեգրի արժեքը կպահի նրանց աշխատավարձից 12 ամսվա ընթացքում: Այդպիսով, նախագծի հեղինակների հաշվարկներով, հանգստավայրային տարածաշրջանում լճացումը պետք է դադարի:

Թուրքիայի արհմիությունների կոնֆեդերացիայի նախագահ Իսմայիլ Քոնջուքը հիշեցրել է, որ պետծառայողների մեծ մասն ապրում է ապրուստի համար նվազագույն սահմանից ցածր եկամուտով, մշտապես վարկեր կամ փող է պարտք վերցնում:

«Պետական ծառայողներն արդեն չեն կարող թույլ տալ իրենց արձակուրդ մեկնել: Եթե կառավարությունն ուզում է նրանց հանգստի ուղարկել, ապա թող վճարի գոնե նրանց ուղեգրի կես արժեքը: Այդ ժամանակ դա կարող է համարվել խրախուսում: Բյուջետայինների մեծամասնությունն այդպես էլ ապրում է պարտքով եւ վարկային քարտերի հաշվին», -նշել է նա:

Թուրքական ԶԼՄ-ները հայտնում են, որ թուրքական Ալանիա քաղաքի Քոնաքլը շրջանի մոտ 400 առեւտրականներ հավաքվել են հանրահավաքի եւ երթ կազմակերպել քաղաքի դատարկ փողոցներով: Նրանք կանգ են առել մզկիթի մոտ եւ աղոթել, որպեսզի զբոսաշրջիկներ գան:

Նրանք հայտարարել են, որ եթե այդպես շարունակվի, ապա իրենք «կվառվեն» եւ կհայտնվեն Մոհմութլարա բանտում` հարկերը մուծել չկարողանալու համար:

Թուրք բիզնեսմենները պատմել են, որ նախորդ տարիներին վաստակի սեզոնը ձգվում էր 5-6 ամիս եւ մարդկանց բարդ էր լինում վարձակալման դիմաց վճարել ձմռան ամիսներին, իսկ այժմ երաշխիք չկա անգամ 2-3 ամսյա սեզոնի համար:

Թուրքիայի հյուրանոցատերերի միության հրապարակած տվյալների համաձայն` Թուրքիայում հյուրանոցների բեռնվածությունը եւ այնտեղ բնակության գները շարունակում են նվազել: Ապրիլին Ստամբուլում հյուրանոցների բեռնվածությունը, 2015 թվականի նույն ժամանակաշրջանի համեմատ, 32 տոկոսով նվազել է: Դա վերջին 10 տարիներին ամենամեծ անկումն է:

Թուրքիայում զբոսաշրջության ոլորտն զարգացում էր ապրում հիմնականում ռուսաստանցի եւ գերմանացի զբոսաշրջիկների հաշվին: Թուրքական զբոսաշրջության ոլորտում ճգնաժամը սկսվել է այն բանից հետո, երբ 2015 թվականի նոյեմբերի 24-ին թուրքական F-16 կործանիչը Սիրիայում խոցել է ռուսաստանյան Սու-24 ռմբակոծիչին: ՌԴ նախագահ Վլադիմիր Պուտինը դա անվանել է ահաբեկիչների հանցակիցների կողմից «հարված թիկունքից»: Միջադեպից հետո ՌԴ նախագահը հրամանագիր է ստորագրել ազգային անվտանգության ապահովման գծով միջոցառումների եւ Թուրքիայի նկատմամբ հատուկ տնտեսական միջոցառումների մասին:

Գերմանացի զբոսաշրջիկների հոսքը Թուրքիա խիստ կրճատվել է այդ երկրում ահաբեկչական գործողությունների հավանականության աճի պատճառով` կապված թուրք-քրդական բախումների հետ:

Ըստ Ռուսաստանյան ԶԼՄ-ների` Մոսկվայի կողմից 2016 թվականի հունվարի 1-ից Թուրքիայի դեմ իրականացվող պատժամիջոցների արդյունքում ընթացիկ տարում Թուրքիան մոտ 10 մլրդ դոլարի վնաս կկրի: