«Ես և սիրելիս մտածում ենք այս տարի օրինականացնել մեր հարաբերությունները». Սոնա Շահգելդյանն ամուսնանում է

Երգչուհի Սոնա Շահգելդյանի համար 2015-ը կնշանավորվի ոչ միայն գործնական բեղմնառատ տարով, այլ նաև անձնական կյանքում երջանիկ տարեթվով. ամենայն հավանականությամբ երգչուհին այս տարի կամուսնանա:

«Միգուցե այս տարի ամուսնություն լինի, առհասարակ, կարծում եմ, շատ անակնկալներ այս տարի դեռ կլինեն,-Life.panorama.am-ի հետ զրույցում նշեց երգչուհին և հավելեց, - ես և սիրելիս մտածում ենք այս տարի օրինականացնել մեր հարաբերությունները: Գուցե ամուսնական մեծ խնջույք չլինի, քանի որ, կարծում ենք, որ ամենակարևորը համատեղ սերն  է: Հաճախ շատ մեծ ու ճոխ հարսանեկան խնջույքներ են կազմակերպում, բայց հետո բաժանության են գնում, ես դրան շատ ցավով եմ վերաբերվում»:

Սոնան պատմեց, որ իր և սիրելին որոշել են առանձին ապրել. «Բոլոր զույգերն էլ ցանկանում են առանձին ապրել, մենք էլ բացառություն չենք. մենք բոլորի կարծիքը հարգում ենք, բայց մեր կյանքը մենք ինքներս ենք որոշում: Ես բնույթով շատ հարմարվող մարդ եմ, բարդություններ ստեղծող չեմ և ընտրել եմ այնպիսի մի մարդու, ով շատ հարցերում ինձ նման է, ինձ համար ամենակարևորն այն է, որ իմ կողքինը լավ մարդ լինի, այլապես այս կյանքում լավ մարդ գտնելը շատ դժվար է»,- նշեց նա:

Խոսելով աշխատանքից՝ Սոնան նշեց, որ արդեն սկսել են խոստացված ֆիլմի՝ Դավիթ Բաբախանյանի «Հյուսիս-հարավ»-ի  նկարահանումները. «Ֆիլմը, որտեղ ես գլխավոր դերակատարներից մեկին եմ մարմնավորում, էկրաններ կբարձրանա մի քանի ամսից: Պետք է ասեմ, որ այն շատ հետաքրքիր սյուժե ունի, շատ դերասաններ և երգիչներ են զբաղված այս ֆիլմում, դեռևս նկարահանումները շարունակվում են»,- պատմեց երգչուհին:

Ի դեպ, գրեթե մեկ ամսից կսկսվեն նաև Սոնա Շահգելդյանի մասնակցությամբ երկրորդ ֆիլմի նկարահանումները, որի մանրամասները երգչուհի չցանկացավ ներկայացնել, նշեց միայն, որ հնարավոր է, որ երկրորդ ֆիլմի սաունդթրեքը հենց նա կատարի:

Նրա խոսքերով նկարահանումների ժամանակ ոչ մի խնդիրների չի բախվել. «Եթե ես անգամ հոգնում եմ նկարահանումների ժամանակ, միևնույն է, ոչ մեկ դա չի զգա, քանի որ ես թեթև մարդ եմ, իհարկե, այդ հարցում նշանակություն ունի նաև թիմը, որտեղ աշխատում եմ, ովքեր իսկապես շատ լավ պրոֆեսիոնալ մարդիկ են»,- նշեց Սոնան:

Ֆիլմարտադրության մեջ խորանալով երգչուհին խոստացավ աչքաթող չանել նաև երգը. «Այս տարի պարտադիր կլինեն նոր տեսահոլովակներ, կշարունակեմ համերգային շրջագայությունները ինչպես Հայաստանի տարբեր մարզերում, այնպես և արտերկրում»,- նշեց նա:

Սոնա Շահգելդյանը նշեց նաև, որ այս տարի մենահամերգով հանդես չի գա, բայց հաջորդ տարի մենահամերգ ունենալը իր ծրագրերի առաջնահերթ շարքերում է:

Զրույցի վերջում երգչուհին նկատեց, որ այս տարի որոշել է հանգիստը անցկացնել Հայաստանում. «Սիրում եմ հանգստանալ մայրիկիս հետ: Մտածում եմ այս տարի հանգիստս Հայաստանում անցկացնել, շատ եմ սիրում Ստեփանավանը և Դիլիջանը: Մենք շատ լավ բնություն ունենք, շատերը այլ երկրներից գալիս են մեզ մոտ հենց մեր բնության համար, ես էլ որոշել եմ մի քանի օր անցկացնել Հայաստանի որևէ տեսարժան վայրում»,- պատմեց Սոնան:

Աղբյուրը՝ Orer.am