Եթե Թոքմաջյանի մոտ ռեկտոր դառնալը չի ստացվի, ապա ինչու՞ չփորձել պոլիտեխնիկում <<Սրբանալ>>

Աշոտ Խաչատրյանը ֆեյսբուքյան իր էջում գրում է. 

Ուղիղ եթերում՝ Ագաթա Քրիստիի ոճը հիշեցնող, իր անձի հետ կապված սեքս սկանդալի մեղադրյալներին «բացահայտելուց» հետո, հուսամ, որ պարոն Թոքմաջյանին հաջողվեց գոնե իր մերձավորներին «համոզել» իր ասածում: Անխոս, լավ է, որ մարդ մաքուր է իր նեղ շրջապատի աչքերում, բայց ոչ իհարկե ուրիշներին սևացնելու հաշվին: Թոքմաջյանի դետեկտիվը աստիճանաբար վեր է ածվում դրամայի: Ներկայանալով իբրև Պոլիտեխնիկի համար անձնազոհ աշխատող ղեկավար, Թոքմաջյանը ամեն գնով փորձում է ընդունել անհիմն մեղադրյալի կեցվածք, ում հետ հունիսի 20-ին՝ ռեկտորի ընտրությունների ժամանակ որոշ ուժեր հաշվեհարդար պետք է տեսնեն: 

Անհասկանալիորեն իր հետ բոլոր կատարվածն ու չկատարվածը ռեկտորի ժ/պ-ն կապում է սեքս սկանդալի հետ. կարծես դա իր համար կատարյալ վահան է, որով ինքը ծածկում ու կոծկում է իր ակնհայտ սխալները և բացթողումները: Ակնհայտ է մի բան, որ Թոքմաջյանին վարկաբեկեց ոչ այնքան բուն սեքս նամակագրությունը, որքան դրան նախորդած ու հաջորդած գործողությունները: 

Անվիճարկելի է, որ Հ. Թոքմաջյանը ձախողեց միասնական Պոլիտեխնիկի ձևավորման գործընթացը, որի համար ինքը նշանակվել էր Պոլիտեխնիկի ռեկտորի ժ/պ: Պոլիտեխնիկում Թոքմաջյանի առաջին գործերից մեկն այն է եղել, որ ինքը 1/5 մասով կրճատեց ուսումնական պրոցեսը. եթե նախկինում ուսանողների հետ աշխատում էին շաբաթական 30 ժամ, ապա դա Թոքմաջյանը դարձրեց 24: Այլ կերպ ասած, հիմա ուսանողների հետ դասախոսները ավելի քիչ են աշխատում, քան նախկինում: Ժամերի կրճատման հետևանքով ազատված գումարները, ռեկտորի ժ/պ առանց մտածելու ուղղեց դեպի շինարարություն: 

Պոլիտեխնիկ գալուց ի վեր, Թոքմաջյանը ամեն գնով՝ հուրով ու թրով փորձում է հաստատել իր ղեկավարությունը: Մասնավորապես ծնելով մի շարք սկանդալներ, քրեական և դատավարական պրոցեսներ, Հ. Թոքմաջյանը փորձեց ձևավորել մի իրավիճակ, որում ռեկտորության հարցում իր թեկնածությանը այլընտրանք չլիներ: Քանի որ կառավարման խորհրդի կեսը կազմում են Պոլիտեխնիկի 8 դասախոսներ և 8 ուսանողներ, ապա Թոքմաջյանը փորձեց անել այնպես, որ ռեկտորի ընտրության ժամանակ Պոլիտեխնիկի 16 ձայները բոլոր պարագաներում լինեն իրենը: Առանց խղճի խայթի և ամաչելու, իրեն տրամադրված ողջ վարչական ուժի կիրառմամբ Թոքմաջյանը կարողացավ դա անել դասախոսների կտրվածքով:

Գիտության վաստակավոր գործիչների, ակադեմիկոսների, ամբիոնի վարիչների փոխարեն կառավարման խորհուրդ «ընտրվեցին» Պոլիտեխնիկի հետ գրեթե կապ չունեցող, բայց Թոքմաջյանին հաստատ ձայն տվող անձինք: Թոքմաջյանին այդ խայտառակության իրականացման հարցում օժանդակեցին նաև գերմաշ հեղինակությամբ «ինքը ռեկտոր ա, ինչ ուզի պիտի անի» գաղափարախոսություն դավանող Պոլիտեխնիկի որոշ կառույցների ղեկավարներ: Ի տարբերություն դրա, Պոլիտեխնիկի ուսանողությունը չենթարկվեց Թոքմաջյանի հալածանքներին և պահպանեց իր անկախ լինելու օրինական իրավունքը:
Այսպիսով՝ Թոքմաջյանը կառավարման խորհրդում փորձում էր ձևավորել մի իրավիճակ, երբ ինքը ունենալով ձայների կեսը, անկախ որևէ մեկի կամքից՝ կառավարության, նախարարի, և այլն, կարողանում է դառնալ ռեկտոր: Կարճ ասած, իր ռեկտոր ընտրվելու հարցում նա ցինիկ ձևով իշխանություններին հատկացնում էր դիտորդի դերը: 

Հիմա դժվար չէ հասկանալ Արմեն Աշոտյանի վերաբերմունքը Թոքմաջյանի հանդեպ, այն անձնավորության, ով անթաքույց կերպով փորձում էր զրկել երկրի և ոլորտի ղեկավարությանը Պոլիտեխնիկում ռեկտորի ընտրությունների վրա ազդելու հնարավորությունից: Թոքմաջյանական քարոզչամեքենան փորձում է ներկայացնել, թե իբր ֆեյսբուքյան նամակագրության հետ կապված նախարարը վրեժխնդիր է լինում, ինչը, իհարկե, անլուրջ է, քանի որ հետաքննությունը ավարտված չէ: Այդուհանդերձ ես իմ դժգոհությունն եմ հայտնում ԿԳ նախարարին, որ ինքը ունենալով բազմաթիվ առիթներ չհեռացրեց Թոքմաջյանին Պոլիտեխնիկից ու եղավ անընկալելի հանդուրժող:

Տարիներ առաջ Պոլիտեխնիկը ղեկավարող՝ շատ հեռատես անձինք տեսնելով և գնահատելով Հովհաննես Թոքմաջյանի մանկավարժական, մասնագիտական և մարդկային որակները նրան ազատեցին այն ժամ իր զբաղեցրած ասիստենտի պաշտոնից: Թոքմաջյանին, ոչ իր դիմումի համաձայն, համալսարանից դուրս «վռնդող» մարդիկ մի գրամ անգամ կասկած չունեին, որ նման քայլով իրենք բացառում են որևէ կարգավիճակով Թոքմաջյանի հետնամուտքը Պոլիտեխնիկ: Բայց արի ու տես՝ մարդը ենթադրում է, իսկ Աստված տնօրինում: Այս պատմությունը գիտական խորհրդի իր ղեկավարած առաջին նիստում, իհարկե փոքր-ինչ այլ ձևակերպումներով, պատմել է հենց ինքը՝ Պոլիտեխնիկի ռեկտորի ժ/պ-ի կարգավիճակում վերադարձած Հ. Թոքմաջյանը:

Պոլիտեխնիկի ֆիզիկայի ամբիոնի պրոֆեսոր Ա. Խաչատրյան: