Դա ակնհայտ ապուշություն է. Ա. Մինասյանը՝ Վահան Հովհաննիսյանի կողմից Վազգեն Սարգսյանի սպանության պատվերի մասին

Արդեն քանի օր է լրատվամիջոցներում հայտնվել են տեղեկություններ սպարապետ Վազգեն Սարգսյանի եւ քաղաքական ծանր հրետանիներից մեկի՝ ՀՅԴ խմբակցության նախկին պատգամավոր Վահան Հովհաննիսյանի մասին: Ըստ տարածված տեղեկատվության՝ նշված երկու անձինք իբր ժամանակին կոնֆլիկտներ են ունեցել, որոնք էլ հիմք են հանդիսացել, որ Վահան Հովհաննիսյանը կազմակերպի Վազգեն Սարգսյանի սպանությունը: Թե ում կամ ինչի համար է անհրաժեշտ պղտորել վաղուց խաղաղված գետը, Orer.am-ը պարզեց ԱԺ ՀՅԴ խմբակցության պատգամավոր Արծվիկ Մինասյանից.

«Կարծում եմ, որ դա հերթական հիմարությունն է, որը տարբեր անձինք փորձում են տարածել: Նրանք օգտվում են այն հանգամանքից, որ լուսահոգի Վահան Հովհաննիսյանն ու Վազգեն Սարգսյանը կենդանի չեն եւ փորձում են ինչ որ անհասկանալի եւ անիմաստ քննարկումներ հրահրել: Ես նման տեղեկատվության տարածումը աբսուրդ եմ համարում. դա պարզապես ապուշություն է»:

Հարցին` քաղաքական ուժերից ո՞ւմ է ձեռնտու նման ստահոդ տեղեկություններ տարածելը, պատգամավորը պատասխանեց. «Չգիտեմ, չեմ կարող ասել, որովհետեւ երեկ դուք տեսաք, որ հանրաքվեի մասին օրենքի փոփոխությունների ժամանակ ինչ կեցվածք էր ընդունել, այսպես կոչված, ընդդիմադիր ուժերից իբր ամենաընդդիմադիր ՀԱԿ-ը, եւ դա այն դեպքում, երբ ընդդիմությանը մեծ տեղ է հատկացվում հանրաքվեի մասին օրենքի փոփոխություններով. այն իրական հնարավորություն էր ապահովում հասարակությանը տեսակետները լիարժեք ներկայացնելու եւ տեղամասերում վստահված անձինք ունենալու հարցում: Սակայն տեսաք, թե ինչպիսինն էր նրանց պահվածքը: Դա ոչ թե հնարավորությունների իրացում է, այլ նրանք ցանկանում են անպայման դիտվել որպես միակը, եւ այս պարագայում ով իրենց հետ չէ, ապա իրենց թշնամին է: Այս կոնտեքստում կարող են զարգանալ տարբեր սցենարներ՝ այդ թվում նաեւ կեղծ, ստոր եւ իրականությանը չհամապատասխանող տեղեկատվության տարածում: Դրանք մեղադրանքերի ներկայացում է, որն իրականությանը չի համապատսխանում: Հնարավոր է, որ իրենց քաղաքական շահերից ելնելով՝ որոշ քաղաքական ուժեր շրջանառության մեջ ինչ որ թեմաներ դնեն»:

Ա. Մինասյանը, չցանկանալով մեղադրել կոնկրետ քաղաքական ուժի, պարզաբանեց. «Ես հստակ չեմ կարող ասել, թե քաղաքական որ ուժի ձեռքի գործն է դա. ՀԱԿ-ի վրա չեմ կասկածում, տվյալ քաղաքական ուժին պարզապես օրինակ բերեցի: Մարդ պետք է մի քիչ արժանապատվություն եւ բարոյականություն ունենա և նման անհեթեթ ու ճղճիմ քայլերի չգնա: Եթե այդ մարդկանց մոտ կան որոշակի տեղեկատվություններ այդ պատմության վերաբերյալ, ապա ասեմ, որ կան իրավապահ մարմիններ, թող դիմեն նրանց: Դա ակնհայտ ապուշություն է, ուղղակի կառաջարկեմ նրանց կանգ առնել»,- հորդորեց պատգամավորը:

Սոսե Չանդոյան

Աղբյուրը՝ Orer.am