Հայաստանը Զարգացման ֆրանսիական գործակալությունից 250 մլն եվրոյի վարկ կներգրավի
ՀՀ կառավարությունը նոյեմբերի 19-ի նիստում հավանություն է տվել Զարգացման ֆրանսիական գործակալության հետ 250 մլն եվրոյի բյուջետային աջակցության վարկային համաձայնագրի հաստատման նախագծին։
2026 թվականի հոկտեմբերի 1-ին ստորագրված համաձայնագրով վարկը կտրամադրվի 20 տարի ժամկետով՝ 5 տարվա արտոնյալ ժամանակահատվածով։ Գումարը կհատկացվի մեկ մասնաբաժնով, իսկ վարկի մայր գումարը կմարվի 30 հավասարաչափ կիսամյակային վճարումներով։ Ծրագրով նախատեսվում է նաև Ասիական զարգացման բանկի կողմից մինչև 250 մլն դոլարի համաֆինանսավորում։
Հայաստանը հնարավորություն կունենա ընտրելու լողացող կամ ֆիքսված տոկոսադրույք։ Լողացող տոկոսադրույքը հաշվարկվելու է վեցամսյա EURIBOR-ին 2,3 տոկոսային կետ ավելացնելով և հոկտեմբերի 30-ի դրությամբ կկազմեր 5,292%։ Ֆիքսված տոկոսադրույքի հաշվարկման համար սահմանված է 5,94% կողմնորոշիչ ցուցանիշ։
Վարկի միանվագ գնահատման վճարը կկազմի 1,25 մլն եվրո։ Նախատեսված են նաև տարեկան 0,5% պարտավորության վճար՝ չմասհանված գումարի նկատմամբ, և 2,5% չեղարկման վճար՝ չեղարկված գումարի նկատմամբ։ Ժամկետանց վճարումների դեպքում տոկոսադրույքը կավելանա 3,5 տոկոսային կետով։
Ֆինանսավորումն իրականացվելու է Զարգացման ֆրանսիական գործակալության և Ասիական զարգացման բանկի եռամյա ծրագրի առաջին ենթածրագրի շրջանակում։ Այն ուղղված է հարկաբյուջետային և պետական պարտքի կառավարման բարելավմանը, հանրային ծառայությունների արդյունավետության բարձրացմանը, ֆինանսական շուկաների զարգացմանը և գործարար միջավայրի բարելավմանը։
Ծրագրի նպատակներից է նաև արտաքին ֆինանսավորումից Հայաստանի կախվածության նվազեցումը՝ ներքին ֆինանսական ռեսուրսների ներգրավման միջոցով։
Հայաստանի պետական բյուջեից համաֆինանսավորում չի նախատեսվում։ Կառավարության հավանությանն արժանացած նախագիծը կներկայացվի ՀՀ նախագահին՝ հաստատման։