Tesla-ն պատրաստվում է դադարեցնել Cybertruck-ի արտադրությունը

Tesla ընկերությունը նախատեսում է 2027 թվականի կեսերին դադարեցնել Cybertruck պիկապների արտադրությունը Տեխասի իր գործարանում. հայտնում է ընկերության գլխավոր տնօրեն Իլոն Մասկը։ Մասկի խոսքով՝ արտադրության դադարեցումը հնարավորություն կտա ավելացնել վերջերս ներկայացված «Cybercab» մոդելի արտադրությունը, որը Tesla-ի ռոբոտաքսիների նախագծի առանցքային մասն է։ Դեռևս պարզ չէ՝ «Cybertruck»-ի արտադրությունն ամբողջությամբ կդադարեցվի, թե կտեղափոխվի մեկ այլ գործարան։

Ներկայումս Տեխասի գործարանը Tesla-ի միակ հայտնի արտադրական կենտրոնն է, որը հագեցած է այս մոդելի հատուկ բաղադրիչների արտադրության համար։ «Cybertruck»-ի վաճառքները տարիներ շարունակ չեն արդարացրել սպասելիքները։ Kelley Blue Book-ի տվյալներով՝ անցյալ տարի ընկերությունն ԱՄՆ-ում վաճառել է 20 237 նման մեքենա՝ 48%-ով պակաս, քան 2024 թվականին, երբ վաճառվել էր 38 965 մեքենա։ Մինչ մոդելի թողարկումը Մասկը կանխատեսել էր տարեկան 250 հազար մեքենայի վաճառք։ Միևնույն ժամանակ, Tesla-ն մեծ հույսեր է կապում «Cybercab»-ի հետ։ Թևանման դռներով այս մոդելը չունի ղեկ, ոտնակներ և հայելիներ։

Cybertruck-ը թողարկվել է 2023 թվականին։ Իլոն Մասկն այն ներկայացնում էր որպես «Ջեներալ Մոթորս»-ի և «Ֆորդ»-ի ավանդական պիկապների ֆուտուրիստական այլընտրանք, սակայն մոդելը չկարողացավ հասնել սպասված հանրաճանաչությանը։ Չժանգոտվող պողպատից պատրաստված անսովոր անկյունավոր թափքը սահմանափակեց ավտոմեքենայի հեռանկարները Միացյալ Նահանգների սահմաններից դուրս։ Մասնավորապես, եվրոպական մի շարք երկրներում վաճառքի թույլտվությունների ստացումը դժվարին ստացվեց։