Հեռախոսազանգերը կվերահսկվեն․ Ռազմական ոստիկանությանը նոր լիազորություններ կտրվեն

Iravaban.net–ը ուսումնասիրել է Իրավական ակտերի նախագծերի հրապարակման միասնական հարթակում հանրային քննարկման ներկայացված և Պաշտպանության նախարարության կողմից մշակված նախագիծը, որով նախատեսում է ընդլայնել ռազմական ոստիկանության օպերատիվ-հետախուզական գործունեության լիազորությունները։ Մասնավորապես, առաջարկվում է ռազմական ոստիկանությանը իրավունք վերապահել իրականացնել թվային, այդ թվում՝ հեռախոսային հաղորդակցության վերահսկում, ինչպես նաև օպերատիվ խնդիրները լուծելու նպատակով ստեղծել իրականում գոյություն չունեցող կազմակերպություններ և օգտագործել ազգային անվտանգության մարմինների պատրաստած քողարկող փաստաթղթեր։

 

 

Նման փոփոխություններ են նախատեսվում «Օպերատիվ-հետախուզական գործունեության մասին» օրենքում լրացումներ և փոփոխություններ կատարելու մասին նախագծով։

 

 

Ինչո՞վ է հիմնավորվում փոփոխությունների անհրաժեշտությունը

 

 

Նախագծի հիմնավորման համաձայն՝ գործող օրենսդրությամբ ռազմական ոստիկանությունն իրականացնում է օպերատիվ-հետախուզական գործունեություն և օրենքով սահմանված դեպքերում ու կարգով՝ հետաքննություն։ Սակայն գործող կարգավորումներն ու տրամադրված գործիքակազմը բավարար չեն համարում ռազմական ոստիկանության առջև դրված խնդիրներն արդյունավետ իրականացնելու համար։

 

Հիմնավորման մեջ նշվում է, որ վերջին տարիներին փոխվում են հանցագործությունների տեսակները, դրանց կատարման եղանակներն ու մեթոդները։ Հանցագործություններ կատարելու, դրանց հետքերը թաքցնելու կամ պարտակելու նպատակով օգտագործվում են նաև տեխնիկական միջոցներ, այդ թվում՝ բջջային և ինտերնետային կապ։

 

Առանձնակի խնդիր են համարվում բարձր լատենտայնություն ունեցող ծանր և առանձնապես ծանր հանցագործությունները, ինչպիսիք են թմրամիջոցների և զենք-զինամթերքի ապօրինի շրջանառությունը, զինվորական ունեցվածքի հափշտակությունները, ինչպես նաև պաշտոնատար անձանց կողմից կատարվող հանցագործությունները։

 

Ռազմական ոստիկանությունը կկարողանա վերահսկել հեռախոսային և թվային հաղորդակցությունը

 

Նախագծի առանցքային փոփոխությամբ առաջարկվում է ռազմական ոստիկանությանը ևս վերապահել «Թվային, այդ թվում՝ հեռախոսային հաղորդակցության վերահսկում» օպերատիվ-հետախուզական միջոցառումն իրականացնելու իրավունք։

 

Ըստ նախագծի հիմնավորման՝ այս հնարավորությունը թույլ կտա ռազմական ոստիկանությանը ժամանակին կանխել, խափանել, հայտնաբերել և բացահայտել զինված ուժերում կատարվող ծանր և առանձնապես ծանր հանցագործությունները։

 

Որպես օրինակ՝ նշվում են ինքնասպանության հասցնելը, շորթումը և այլ հանցագործություններ։ Նախատեսվող գործիքը կարող է օգտագործվել նաև դրանց առաջացման պատճառներն ու պայմանները բացահայտելու համար, այդ թվում՝ զինված ուժերում ոչ կանոնադրական հարաբերությունների և քրեական ենթամշակույթին բնորոշ բարքերի առկայությունը պարզելու նպատակով։

 

Հիմնավորման մեջ ընդգծվում է, որ միջոցառումն իրականացվելու է այն նույն ընդհանուր պահանջներով, որոնք ներկայում գործում են ոստիկանության, քրեակատարողական ծառայության մարմինների և Հակակոռուպցիոն կոմիտեի համար։

 

Կստեղծվեն իրականում գոյություն չունեցող կազմակերպություններ

 

Նախագծով նախատեսվում է ռազմական ոստիկանությանը հնարավորություն տալ իր առջև դրված խնդիրներն իրականացնելու նպատակով, օրենքով սահմանված կարգով, ստեղծել իրականում գոյություն չունեցող կազմակերպություններ։

 

Բացի այդ, ռազմական ոստիկանությունը կկարողանա օգտագործել ազգային անվտանգության մարմինների պատրաստած քողարկող փաստաթղթեր։

 

Հիմնավորման համաձայն՝ այս լիազորությունների անհրաժեշտությունը պայմանավորված է օպերատիվ-հետախուզական միջոցառումների արդյունավետ իրականացման և դրանց մեթոդների ու միջոցների գաղտնիության ապահովման անհրաժեշտությամբ։

 

Ի՞նչ փոփոխություններ են կատարվելու օրենքում

 

Նախագծով առաջարկվում է փոփոխություններ կատարել «Օպերատիվ-հետախուզական գործունեության մասին» օրենքի երեք հոդվածներում։

 

• 10-րդ հոդված․ ռազմական ոստիկանությունը կներառվի այն մարմինների շարքում, որոնք կարող են իրականացնել թվային, այդ թվում՝ հեռախոսային հաղորդակցության վերահսկում։

 

• 14-րդ հոդված․ 2.1-ին մասում 11-րդ կետից հետո կավելացվի 12-րդ կետի վերաբերյալ հղում։

 

• 31-րդ հոդված․ ռազմական ոստիկանությունը կներառվի այն մարմինների շարքում, որոնք իրենց խնդիրներն իրականացնելու նպատակով կարող են օրենքով սահմանված կարգով ստեղծել իրականում գոյություն չունեցող կազմակերպություններ և օգտագործել ազգային անվտանգության մարմինների պատրաստած քողարկող փաստաթղթեր։

 

Ի՞նչ արդյունք է ակնկալվում

 

Նախագծի հեղինակների գնահատմամբ՝ փոփոխությունների ընդունումը կնպաստի զինված ուժերում ծանր և առանձնապես ծանր հանցագործությունների, ինչպես նաև այլ իրավախախտումների կանխարգելման, հայտնաբերման և բացահայտման արդյունավետության բարձրացմանը։

 

Ակնկալվում է նաև, որ դա կնպաստի զինված ուժերում կանոնադրական հարաբերությունների և բարոյահոգեբանական վիճակի ամրապնդմանը, ինչպես նաև մարտունակության բարձրացմանը։

 

Նախագծի ընդունմամբ պետական բյուջեի եկամուտների և ծախսերի փոփոխություն չի նախատեսվում։

 

Նախագծով սահմանվում է, որ օրենքն ուժի մեջ կմտնի պաշտոնական հրապարակմանը հաջորդող տասներորդ օրը»,- տեղեկացնում է կայքը։