Պենտագոնը հաստատել է, որ Հեգսեթը կմնա իր պաշտոնում

Փիթ Հեգսեթը, չնայած իրեն հնարավոր փոխարինելու մասին հաղորդագրություններին, կմնա ԱՄՆ պատերազմի նախարարի պաշտոնում մինչև Դոնալդ Թրամփի նախագահական ժամկետի ավարտը, Fox News հեռուստաալիքին տված հարցազրույցում հայտարարել է Պենտագոնի պաշտոնական ներկայացուցիչ Շոն Փարնելը։

Հեգսեթը «100 տոկոսով կղեկավարի գերատեսչությունը մինչև նախագահ Թրամփի լիազորությունների ժամկետի ավարտը», ասել է նա։

Փարնելը նշել է. «Նախարար Հեգսեթը չի նահանջի և թույլ չի տա, որ իրեն վախեցնեն քաղաքական գործիչները, որոնք փորձում են միավորներ հավաքել կուսակցական պայքարում կամ շինծու հետաքննություններ նախաձեռնել այնտեղ, որտեղ որևէ խախտում չկա»։

«Պատերազմի նախարարությունը գործում է օրենքին խստորեն համապատասխան, և մեր նախարարը կշարունակի ամեն օր պայքարել հանուն սահմանադրության պահպանման ու պաշտպանության, ղեկավարել մեր զորքերը և պաշտպանել Ամերիկան, — հավելել է Փարնելը։ — Մենք կշարունակենք նախարարությունում իրականացնել նախագահ Թրամփի քաղաքականությունը՝ չնայած բեմադրված «վհուկների որս» կազմակերպելու դեմոկրատների սպառնալիքներին»։

Ավելի վաղ Թրամփը հայտարարել էր, որ գոհ է Պենտագոնի ղեկավար Փիթ Հեգսեթի աշխատանքից և չի դիտարկում նրան պաշտոնանկ անելու հարցը։

«Ո՛չ, կարծում եմ՝ նա հիանալի է կատարում իր աշխատանքը», — չորեքշաբթի լրագրողներին ասել է նա՝ պատասխանելով այն հարցին, թե արդյոք պատրաստվում է պաշտոնանկ անել պատերազմի նախարարին։

Չորեքշաբթի CBS News հեռուստաալիքը, հղում անելով աղբյուրներին, հայտնել էր, որ ԱՄՆ Կոնգրեսի միջանկյալ ընտրություններում դեմոկրատների հաղթանակից հետո Թրամփը խորհրդականների հետ քննարկում է Հեգսեթի ապագան։