Ucom-ը՝ Միկրոէլեկտրոնիկայի միջազգային 21-րդ օլիմպիադայի գլխավոր հովանավոր

Ucom-ի աջակցությամբ Երևանում ամփոփվեց Միկրոէլեկտրոնիկայի միջազգային 21-րդ օլիմպիադան, որին այս տարի մասնակցեց 931 երիտասարդ՝ 17 երկրից։ Ընկերությունը հանդես էր գալիս որպես օլիմպիադայի գլխավոր հովանավոր։

Նոյեմբերի 1–4-ն անցկացված օլիմպիադայի եզրափակիչ մրցույթը տեղի է ունեցել նոյեմբերի 2-ին՝ «Սինոփսիս Արմենիա» ընկերությունում։ Օտարերկրյա եզրափակիչ անցած 17 մասնակիցներից 14-ը ժամանել են Հայաստան՝ մրցույթին տեղում մասնակցելու համար։ Մրցանակաբաշխությունն անցկացվեց նոյեմբերի 3-ին՝ «Silicon Mountains Tech Summit 2026» գագաթնաժողովի շրջանակում։

21-րդ օլիմպիադայի հաղթողներն էին՝ առաջին տեղ՝ Լիանա Խաչատրյան (Հայաստան), երկրորդ տեղ՝ Ասան Նդիայե (Ֆրանսիա), երրորդ տեղ՝ Նատալի Ջուլջյան (Լիբանան), Արթուր Սարիբեկյան (Հայաստան) և Անտոն Գլինին (Ռուսաստան)։ 44-օրյա պատերազմում զոհված Արման Ճաղարյանի անվան «Լավագույն ինժեներական լուծում» հատուկ մրցանակին արժանացել է Հայկուշ Պետրոսյանը (Հայաստան)։

«Հայաստանի տեխնոլոգիական զարգացումը սկսվում է կրթությունից և երիտասարդների համար ստեղծվող հնարավորություններից։ Մեզ համար կարևոր է, որ նրանք կարողանան փորձել իրենց ուժերը, սովորել միմյանցից և տեսնել, թե ինչպես կարող են իրենց գիտելիքներով մասնակցել նոր տեխնոլոգիաների ստեղծմանը։ Ucom-ն աջակցում է այս օլիմպիադային՝ խրախուսելու երիտասարդների մասնագիտական աճը և նպաստելու Հայաստանում տեխնոլոգիական ոլորտի զարգացմանը։ Վստահ եմ՝ այստեղ ձեռք բերված փորձն ու կապերը նրանց կօգնեն ավելի համարձակ քայլեր անել իրենց մասնագիտական ճանապարհին», - նշել է Ucom-ի գլխավոր տնօրեն Ռալֆ Յիրիկյանը։

Օլիմպիադան խթանում է երիտասարդների հետաքրքրությունը միկրոէլեկտրոնիկայի և կիսահաղորդչային տեխնոլոգիաների նկատմամբ՝ նրանց հնարավորություն տալով գնահատելու սեփական գիտելիքներն ու մասնագիտական կարողությունները, փորձ փոխանակելու և կապեր հաստատելու տարբեր երկրների հասակակիցների հետ։ Նախաձեռնությունը նաև նպաստում է կրթական ծրագրերի արդիականացմանն ու Հայաստանի միջազգային ճանաչելիության բարձրացմանը։

Մրցույթի առաջադրանքներն ընդգրկում են թվային, անալոգային և խառը ազդանշանային ինտեգրալ սխեմաների նախագծումն ու թեստավորումը, կիսահաղորդչային սարքերն ու տեխնոլոգիաները, ինչպես նաև ինտեգրալ սխեմաների ավտոմատացված նախագծման մաթեմատիկական և ալգորիթմական ապահովումը։

Այս տարի օլիմպիադային մասնակցել են երիտասարդներ Հայաստանից, Արգենտինայից, Բրազիլիայից, Եգիպտոսից, Էստոնիայից, Ֆրանսիայից, Հնդկաստանից, Հորդանանից, Լիբանանից, Պերուից, Լեհաստանից, Ռուսաստանից, Ռուանդայից, Շրի Լանկայից, Արաբական Միացյալ Էմիրություններից, ԱՄՆ-ից և Վիետնամից։ Էստոնիան և Ռուանդան մրցույթին ներկայացված են առաջին անգամ։ Օլիմպիադան իր գործունեության 21 տարիների ընթացքում համախմբել է հազարավոր ուսանողների և երիտասարդ մասնագետների 42 երկրից։

«Միկրոէլեկտրոնիկայի միջազգային օլիմպիադան դարձել է կարևոր միջազգային հարթակ՝ տաղանդավոր ուսանողների բացահայտման, կրթության ոլորտում բարձր առաջադիմության խթանման և նորարարների հաջորդ սերնդի ոգեշնչման համար։ Անցած 21 տարիների ընթացքում Օլիմպիադան համախմբել է մասնակիցների 42 երկրից՝ երիտասարդ տաղանդներին հնարավորություն ընձեռելով փորձարկելու իրենց գիտելիքներն ու կարողությունները, փոխանակելու գաղափարներ և հաստատելու երկարաժամկետ մասնագիտական կապեր։ Մենք հպարտ ենք, որ Օլիմպիադան շարունակում է հետաքրքրություն առաջացնել միկրոէլեկտրոնիկայի նկատմամբ, խթանել մասնագիտական բարձր որակավորումը և նպաստել ապագա նորարարների միջազգային համայնքի ձևավորմանը, որի ներկայացուցիչները կկերտեն վաղվա տեխնոլոգիաները», -  նշել է Օլիմպիադայի ծրագրային կոմիտեի նախագահ, «Սինոփսիս Արմենիա» ընկերության կրթական դեպարտամենտի տնօրեն, պրոֆեսոր Վազգեն Մելիքյանը։

Միկրոէլեկտրոնիկայի միջազգային օլիմպիադան հիմնադրվել է 2006 թվականին՝ «Սինոփսիս Արմենիա» ընկերության նախաձեռնությամբ և ՀՀ վարչապետի հովանու ներքո։ Այն կազմակերպվում է Էլեկտրատեխնիկայի և էլեկտրոնիկայի ինժեներների ինստիտուտի՝ IEEE-ի Թեստավորման տեխնոլոգիաների տեխնիկական խորհրդի (IEEE TTTC) հետ համագործակցությամբ։