ԵՊՀ-ում քննություն «ստանալու» փող են տվել, բայց «կտրվել»՝ դիմել են իրավապահներին․ «Ժողովուրդ»

«Ժողովուրդ»-ի տեղեկություններով՝ ԵՊՀ երկու ամբիոնի վարիչների ձերբակալության գործով իրավապահներին դիմած անձինք, քննությունը «ստանալու» ակնկալիքով, գումար են փոխանցել, սակայն քննությունից «կտրվել» են։

Օրաթերթին Երևանի պետական համալսարանում տեղի ունեցած աղմկահարույց ձերբակալությունների գործով նոր մանրամասներ են հայտնի դառնում։

Հիշեցնենք, որ հոկտեմբերի 27-ին ArmLur.am-ը գրել էր, որից հետո Հակակոռուպցիոն կոմիտեն հայտնել էր՝ քրեական վարույթի շրջանակում ձերբակալվել է չորս անձ, այդ թվում՝ ԵՊՀ իրավագիտության ֆակուլտետի սահմանադրական իրավունքի ամբիոնի վարիչ Վարդան Այվազյանը և պատմության ֆակուլտետի հայոց պատմության ամբիոնի վարիչը։ Վարդան Այվազյանը մեղադրվում է կաշառք ստանալու, իսկ Էդիկ Մինասյանը՝ կաշառք ստանալուն օժանդակելու մեջ։

Սակայն օրաթերթի իշխանական աղբյուրների փոխանցմամբ՝ գործի ուշագրավ հանգամանքներից մեկն այն է, որ մյուս երկու ձերբակալվածները, ըստ նախնական տեղեկությունների, ենթադրաբար այն անձինք են, որոնք գումար են փոխանցել քննություն հանձնելու ակնկալիքով։

Ըստ աղբյուրների փոխանցմամբ՝ նրանք դիմել են իրավապահներին այն բանից հետո, երբ, ըստ իրենց ներկայացրած տեղեկությունների, քննություն հանձնելու համար գումար են փոխանցել, սակայն արդյունքում կտրվել են և չեն ստացել ակնկալվող գնահատականը։

Այս հանգամանքն էլ հարցեր է առաջացնում՝ ինչպե՞ս է կազմակերպվել գումարի փոխանցումը, ո՞վ է ստացել այն, և ի՞նչ ապացույցներ են ներկայացվել իրավապահներին։

Օրաթերթի աղբյուրների փոխանցմամբ՝ գործով ուշադրության կենտրոնում են ԵՊՀ երկու ամբիոնի վարիչներ։ Միաժամանակ, ենթադրյալ կաշառք տված անձանց ինքնության, գումարի չափի և փոխանցման կոնկրետ հանգամանքների վերաբերյալ պաշտոնական ամբողջական տեղեկատվություն դեռևս հրապարակված չէ։ Ըստ տեղեկությունների դասախոսները բարեկամներ են՝ աներ-փեսա։

Հոկտեմբերի 28-ին հայտնի դարձավ նաև, որ Վարդան Այվազյանի նկատմամբ որպես խափանման միջոց կիրառվել է կալանքը, իսկ Էդիկ Մինասյանի նկատմամբ՝ տնային կալանքը։