Զելենսկին առաջին անգամ համաձայնել է Ռուսաստանի պայմաններին

Ուկրաինայի նախագահն առաջին անգամ ընդունել է, որ Մոսկվան նույնպես կարող է անվտանգության երաշխիքներ ստանալ խաղաղության համաձայնագրի շրջանակում, ինչը զգալի փոփոխություն է դարձել Կիևի և Մոսկվայի միջև խաղաղ բանակցությունների հնարավոր վերսկսման ֆոնին։ Այս մասին գրում է The Financial Times-ը:

Զելենսկին հայտարարել է, որ արևմտյան տերությունները ի վերջո կարող են քննարկել անվտանգության երաշխիքների վերաբերյալ Մոսկվայի պահանջները, սակայն պնդել է, որ նախ անհրաժեշտ է բավարարել անվտանգության ոլորտում հենց Կիևի սեփական կարիքները։

Մինչ այժմ Կիևը և նրա արևմտյան դաշնակիցները մերժում էին ՆԱՏՕ-ից անվտանգության երաշխիքների և եվրոպական անվտանգության ճարտարապետության լայնածավալ բարեփոխման վերաբերյալ Ռուսաստանի պահանջները՝ դրանք դիտարկելով որպես Մոսկվայի ազդեցության ոլորտը վերականգնելու և իր հարևանների ինքնիշխանությունը խաթարելու փորձեր։

«Առաջին հերթին մենք պետք է լուծենք այս պատերազմի հարցը, և միայն դրանից հետո փնտրենք այն հարցերի պատասխանները, որոնք բարձրացնում է Ռուսաստանը՝ ելնելով անվտանգության նկատմամբ սեփական հայացքներից և ակնկալիքներից», — Կիևում լրագրողներին հայտարարել է Զելենսկին։

Ուկրաինայի, Ռուսաստանի և ԱՄՆ-ի բանակցային խմբերը պետք է հանդիպեն նոյեմբերի սկզբին Աբու Դաբիում այն բանի համար, ինչը Զելենսկին անվանել է տեխնիկական բանակցություններ դեէսկալացիայի հնարավոր միջոցառումների շուրջ, ներառյալ էներգետիկ և ծովային ոլորտներում դժվարհասանելի հրադադարը, ինչպես նաև Ուկրաինայի համար անվտանգության երաշխիքների քննարկման նպատակով։

Զելենսկին պնդել է, որ հետպատերազմյան կարգավորման և անվտանգության երաշխիքների քննարկումներում անհրաժեշտ կլինի Եվրոպայի մասնակցությունը․

«Մենք կարող ենք քննարկել հայեցակարգային հարցերը ռուսների հետ Ամերիկայի միջնորդությամբ։ Բայց եթե մենք անցնենք անվտանգության երաշխիքների ձևաչափին, և ձեռք բերվի պայմանավորվածություն այն մասին, որ այդ երաշխիքները կպահանջեն Եվրոպայի մասնակցությունը, ապա Եվրոպան պետք է լինի այդ քննարկումների մի մասը»։

Սա տեղի է ունեցել Ֆինլանդիայի նախագահ Ալեքսանդր Ստուբի և Նորվեգիայի վարչապետ Յոնաս Գահր Ստյորեի՝ Վլադիմիր Պուտինի հետ ունեցած հեռախոսազրույցից մի քանի ժամ անց։

Զելենսկին հայտարարել է, որ խոսել է Ստուբի և Ստյորեի հետ Պուտինի հետ նրանց հեռախոսազրույցի նախօրեին և անմիջապես դրանից հետո։

Զելենսկու խոսքով՝ երկու առաջնորդներն էլ նշել են, որ իրենց մոտ տպավորություն է ստեղծվել, թե Մոսկվան «լրջորեն» է վերաբերվում Աբու Դաբիում նախատեսված բանակցություններին։

Ուկրաինայի նախագահը նաև ընդունել է, որ եվրոպացիների զանգը Պուտինին տեղի է ունեցել Ռուսաստանի և ԱՄՆ-ի միջև շփումների վերսկսման պահին՝ հայտարարելով, որ Մոսկվան ձգտում է առաջարկել ԱՄՆ-ին «մի տեսակ «տնտեսական ամուսնություն»։ Ինչպես հայտնել էր Ֆայնենշլ Թայմսը, ամերիկացի բանակցողները Մոսկվայի հետ քննարկում են խոշոր գործարար գործարքներ՝ փորձելով համոզել Մոսկվային դադարեցնել պատերազմն Ուկրաինայում։

Զելենսկին նաև կրկնել է վաղեմի պահանջն այն մասին, որ տարածքային հարցերը պետք է քննարկվեն միայն առաջնորդների մակարդակով։

Զելենսկին նաև հայտարարել է, որ Ուկրաինան «պատրաստ էր» քննարկել ԱՄՆ-ի առաջարկը ռազմաճակատի գծի երկու կողմերում ապառազմականացված գոտի ստեղծելու վերաբերյալ։

Անվտանգության ոլորտում Ռուսաստանի պահանջների վերաբերյալ մեկնաբանությունները և Արևմուտքի ու Մոսկվայի միջև քննարկումների վերսկսումն ընդգծել են Կիևի աճող անհանգստությունը Ռուսաստանի և ԱՄՆ-ի վերջին մերձեցման կապակցությամբ։

Ուկրաինայի նախագահը հայտարարել է, որ «ազդակներ է լսել» Եվրոպայում ամերիկյան զորքերի թվաքանակի հնարավոր կրճատման մասին։

«Իմ կարծիքով՝ անվտանգության երաշխիքները Ռուսաստանի համար՝ այն տեսքով, ինչպես դա հասկանում է Ռուսաստանը, նշանակում են Եվրոպայում և աշխարհում անվտանգության համակարգի փոփոխություն», — ասել է նա։