Ֆրանսիայում անկարգությունների ժամանակ թալանվել է մոտ 3000 խանութ

Ֆրանսիայում տեղի ունեցած ցույցերի ընթացքում, որոնք ուղեկցվել են անկարգություններով և խռովություններով, թալանչիները կողոպտել են մոտ 3000 խանութ։ Այս մասին հայտնել է երկրի արդարադատության նախարար Ժերալ Դարմանենը։

«Կարծում եմ՝ երբ 3000 խանութ է թալանվում, [բիզնեսի սեփականատերերը] իրավացի են՝ ասելով, որ պետությունը չի կատարել իր պարտականությունը։ Ակնհայտ է, որ այդ գիշեր անվտանգությունը պատշաճ մակարդակով չի ապահովվել. սա մի փաստ է, որն ընդունել է նաև ներքին գործերի նախարարը», - ասել է Դարմանենը «Europe 1» ռադիոկայանին տված հարցազրույցում։

«Անհրաժեշտություն չկա արտակարգ դրություն հայտարարելու։ Մենք չպետք է զրկենք Ֆրանսիայի բոլոր քաղաքացիներին իրենց անձնական ազատություններից միայն այն պատճառով, որ նրանց շարքերում կան մի քանի հազար օրինախախտներ և անկարգություններ հրահրողներ»,- ընդգծել է նախարարը։

Հոկտեմբերի 17-ին Փարիզում և Ֆրանսիայի այլ քաղաքներում տեղի ունեցան զանգվածային ցույցեր՝ ի բողոք վառելիքի գների բարձրացման և բնակչության գնողունակության անկման։

Ըստ կազմակերպիչների՝ ակցիաներին մասնակցել է 800 000 մարդ, մինչդեռ Ներքին գործերի նախարարության տվյալներով՝ մասնակիցների թիվը կազմել է 550 000. սա երկու անգամ ավելին է, քան կանխատեսել էին անվտանգության ծառայությունների վերլուծաբանները։ Մի շարք քաղաքներում բողոքի ակցիաները վերաճել են անկարգությունների և ոստիկանության հետ բախումների։ Ներքին գործերի նախարար Լորան Նունյեսը խոստացել է, որ իշխանությունները շարունակելու են հետապնդել բոլոր նրանց, ովքեր մասնակցել են անկարգություններին և թալանին։