CNN-ը, Politico-ն և «MS NOW»-ն դատի են տվել Թրամփի վարչակազմին

ԱՄՆ լրատվամիջոցներ CNN-ը, Politico-ն և MS NOW-ն (նախկինում՝ MSNBC) հայց են ներկայացրել ԱՄՆ նախագահ Դոնալդ Թրամփի և նրա վարչակազմի երեք բարձրաստիճան պաշտոնյաների դեմ։

Ինչպես հայտնում է Politico-ն, ԶԼՄ-ները պահանջում են վերականգնել իրենց լրագրողների մուտքը Սպիտակ տուն։

Հայցի հիմք է ծառայել Թրամփի վարչակազմի՝ հավատարմագրումը չեղարկելու որոշումը։ Շաբաթ օրը լրագրողներին արգելվել է մուտք գործել Սպիտակ տան տարածք, իսկ Գաղտնի ծառայությունը չեղարկել է նրանց անցագրերը։

Համատեղ հայտարարության մեջ լրատվամիջոցները միջադեպը որակել են որպես «ուղղակի հարձակում [ԱՄՆ Սահմանադրության] Առաջին փոփոխության վրա»՝ պնդելով, որ Սպիտակ տունը լրագրողներին զրկել է մուտքի իրավունքից նրանց լուսաբանումներից դժգոհ լինելու պատճառով։

Լրատվամիջոցները նշել են, որ նախնական ծանուցման և պատշաճ ընթացակարգի բացակայությունը խախտել է ԱՄՆ Սահմանադրության Հինգերորդ փոփոխությամբ երաշխավորված՝ պատշաճ իրավական ընթացակարգի իրավունքը։

«Կառավարության գործը չէ որոշել, թե ինչ պետք է լուսաբանի կամ հրապարակի մամուլը։ <...> Այս քայլը [Թրամփի վարչակազմի արգելքը] առանց հակազդեցության թողնելը կվտանգի մամուլի ազատությունը և հանրության՝ կառավարության միջամտությունից զերծ անկախ լրագրության իրավունքը», - ասվում է հայտարարության մեջ։

Կազմակերպությունները խնդրել են Վաշինգտոնի շրջանային դատարանին հրատապ կարգով հակասահմանադրական ճանաչել վարչակազմի գործողությունները և արգելել դրանց հետագա կիրառումը։ Բացի Թրամփից, հայցում որպես պատասխանող կողմ նշված են Սպիտակ տան աշխատակազմի ղեկավար Սյուզի Ուայլսը, հաղորդակցության գծով տնօրեն Սթիվեն Չունգը և Գաղտնի ծառայության տնօրեն Շոն Կարանը։

Սպիտակ տունը և ԱՄՆ արդարադատության նախարարությունը Politico-ին մեկնաբանություն չեն տրամադրել հայցի վերաբերյալ։

Ավելի վաղ՝ սեպտեմբերի 18-ին, Թրամփը հայտարարել էր Սպիտակ տուն այցելելու հարցում CNN-ի, MSNBC-ի և Politico-ի նկատմամբ արգելք սահմանելու մասին։ Նախագահն այդ լրատվամիջոցներին մեղադրել էր «կեղծ լուրեր» տարածելու մեջ և նշել, որ որոշումը կապված է եղել նրանց լուսաբանումների հետ։ Նա նաև քննադատել էր Politico-ին այն հանգամանքի համար, որ Ջո Բայդենի վարչակազմի օրոք կառավարությունը ավելի քան 8 միլիոն դոլար է ծախսել այդ պարբերականի բովանդակությանը բաժանորդագրվելու վրա։