Աշխարհում էներգիայի սպառումն առաջիկա 25 տարում կավելանա մեկուկես անգամ

Աշխարհում էներգիայի սպառումն առաջիկա 25 տարում կավելանա գրեթե մեկուկես անգամ, ինչը տեղի կունենա հիմնականում Ասիայի երկրների, այդ թվում՝ Չինաստանի ու Հնդկաստանի զարգացման հաշվին: Ինչպես տեղեկացնում է «Արմենպրես»-ը, այս եզրակացությունն է բովանդակում մինչեւ 2040 թվականն ընկած ժամանակաշրջանում գլոբալ էներգետիկական շուկաներում իրադրության զարգացման վերաբերյալ ԱՄՆ-ի էներգետիկայի նախարարությանն առընթեր անկախ տեղեկատվական վարչության նոր զեկույցը:

Հետազոտության հեղինակներն այն կարծիքին են, որ այդ ժամանակահատվածում «աշխարհում էներգիայի սպառումը կավելանա 48 տոկոսով (1,4 տոկոս տարեկան տեմպերի դեպքում)»: Նրանց գնահատումների համաձայն՝ «այդ ցուցանիշի աճի կեսից ավելին կապահովեն Տնտեսական համագործակցության եւ զարգացման կազմակերպության մեջ չմտնող ասիական երկրները, այդ թվում՝ Չինաստանը եւ Հնդկաստանը»: Նրանք նաեւ կմնան նավթի գլխավոր համաշխարհային սպառողները:

Սակայն նման վիճակը բացատրվում է ոչ միայն այս կամ այն երկրի տնտեսության զարգացման տեմպերով, այլեւ էներգախնայողական տեխնոլոգիաների ներդրման մակարդակով եւ արդյունաբերական արտադրության էներգաարդյունավետությամբ: Ամերիկացի փորձագետների հաշվարկների համաձայն՝ ՏՀԶԿ-ի մեջ մտնող զարգացած երկրներին 2040 թվականին բաժին կընկնի աշխարհում էներգիայի ընդհանուր սպառման ընդամենը 35 տոկոսը:

Զեկույցում նաեւ նշվում է, որ էներգիայի հիմնական ծախսը տեղի կունենա արդյունաբերական արտադրության մեջ: 2040 թվականին այն նախկինի պես «կկլանի» ամբողջ գլոբալ էներգիայի կեսից ավելին:

Մյուս գլխավոր սպառողները, ասված է փաստաթղթում, կմնան «տրանսպորտը (26 տոկոս) եւ շենքերը (21 տոկոս)», հաղորդել է ՏԱՍՍ-ը: