Յամալի և Ռաֆինյայի դուբլերը հաղթանակ են պարգևում «Բարսելոնային» «Ռայո Վալեկանոյի» դեմ խաղում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսպանիայի Լա Լիգայի 3-րդ տուրում «Բարսելոնան» «Սփոթիֆայ Կամպ Նոու» մարզադաշտում ընդունեց «Ռայո Վալեկանոյին» և գոլառատ, դիտարժան պայքարում առավելության հասավ 5:2 հաշվով:

Հանդիպման հաշիվը 12-րդ րոպեին բացեց հյուրերի հարձակվող Սերխիո Կամելյոն: Կատալոնացիները պատասխանեցին կայծակնային արագությամբ. 19-րդ րոպեին Ռաֆինյան վերականգնեց հավասարությունը, իսկ ընդամենը երկու րոպե անց Լամին Յամալը առաջ մղեց դաշտի տերերին: Երկրորդ խաղակեսի մեկնարկում՝ 51-րդ րոպեին, հյուրերի պաշտպան Ֆլորիան Լեժյոնը գրավեց սեփական դարպասը՝ մեծացնելով «Բարսելոնայի» առավելությունը: 59-րդ րոպեին Կամելյոն դուբլ ձևակերպեց և հույս արթնացրեց «Ռայոյի» համար, սակայն 71-րդ րոպեին Ռաֆինյան խփեց իր երկրորդ գնդակը, իսկ հիմնական ժամանակի վերջին րոպեին Յամալը նույնպես դուբլ գրանցեց իր ակտիվում՝ ձևակերպելով վերջնական՝ 5:2 հաշիվը:

Հատկանշական է, որ Յամալի առաջին գոլն այս հանդիպումում պատմական էր: 19 տարեկան և 49 օրական հասակում իսպանացի տաղանդը խփեց իր 50-րդ գոլը «Բարսելոնայի» կազմում՝ դառնալով ակումբի պատմության մեջ այս նշագծին հասած ամենաերիտասարդ ֆուտբոլիստը (գերազանցելով Լիոնել Մեսսիի և Խոսեպ Էսկոլայի ցուցանիշները)։ Միևնույն ժամանակ, նա դարձավ Եվրոպայի թոփ-5 լիգաների պատմության մեջ 50 գոլի հեղինակ դարձած ամենաերիտասարդ խաղացողը՝ շրջանցելով Կիլիան Մբապեին և Էրլինգ Հալանդին: Մինչ այս Յամալը վերջին անգամ աչքի էր ընկել ԱԱ-2026-ում՝ Սաուդյան Արաբիայի դեմ խաղում, և դրանից հետո 8 պաշտոնական խաղ անցկացրել առանց գոլի:

Այս հաղթանակից հետո «Բարսելոնան» վաստակեց 9 միավոր և գլխավորեց Լա Լիգայի մրցաշարային աղյուսակը՝ լրացուցիչ ցուցանիշներով (գնդակների տարբերությամբ) շրջանցելով Մադրիդի «Ռեալին», որը նույնպես վաստակել է 9 միավոր: «Ռայո Վալեկանոն» իր ակտիվում ունի 1 միավոր և զբաղեցնում է 18-րդ հորիզոնականը:

Հաջորդ հանդիպումը կատալոնական ակումբը կանցկացնի սեպտեմբերի 6-ին՝ հյուրընկալվելով «Վալենսիային», իսկ «Ռայո Վալեկանոն» մեկ օր առաջ սեփական հարկի տակ կմրցի «Ռասինգի» հետ:

Հետևեք մեզ՝ այստեղ